Ол 2022 жылдың 12 қазанында Ортсайлауком Қазақстан Республикасы Парламенті Сенатының депутаты Ақылбек Қажығұлұлы Күрішбаевтың өкілеттігін тоқтатуға әкеп соқтыратын негіздің пайда болуы туралы қаулы қабылдағанын айтты. Парламент Сенатының 2022 жылғы 13 қазандағы қаулысымен Сенат депутаты А.Қ.Күрішбаевтың өкілеттігі тоқтатылды. Сондай-ақ ол Қазақстан Республикасындағы сайлау туралы Конституциялық Заңның 69 және 83-баптарына сәйкес, Орталық сайлау комиссиясы Парламент Сенатының депутатынан шығып қалғандардың орнына олардың мерзімінен бұрын тоқтатылған сәтінен бастап екі айдан кешіктірмей сайлауды тағайындауға тиіс екенін атап өтті.
Бұл ретте, Ортсайлаукомның шешімімен шығып қалған депутаттың орнына Астана қаласынан Қазақстан Республикасы Парламенті Сенатының депутатын сайлау 2022 жылғы 22 желтоқсанға бекітілді.
Ортсайлауком төрағасының орынбасары Константин Петров Конституцияға сәйкес, отыз жасқа толған, соңғы он жылда ел аумағында және тиісті облыстың, республикалық маңызы бар қаланың не астананың аумағында кемінде үш жыл тұрақты тұрып жатқан Қазақстан Республикасының азаматы Парламент Сенатының депутаты бола алатынын атап өтті. Сонымен қатар, кандидаттың жоғары білімі және кемінде бес жыл жұмыс өтілі болуы керек. Белсенді сайлау құқығына ие болуы қажет.
