Алдымен қонақтар мектеп мұражайындағы түркі әлемінің айтулы тұлғасының саяси көзқарасының қалыптасуына әсер еткен тарихи оқиғалар мен шетелде эмиграцияда жүрген кезеңдегі қоғамдық қызметі туралы баяндаған деректермен танысты. Одан соң қайраткердің өмірі мен саяси жолы және Түркістан, Түркия, Франция елдеріндегі тағдыры мен сонда көрген қиындықтары туралы жазған туындысынан үзінді тамашалады.
Іс-шара дөңгелек үстел мәжілісі форматында өткендіктен мектеп оқушылары қонақтармен еркін әңгімелесіп, оларға ұлт күрескерінің өмірі мен саяси қызметі туралы сұрақтарын қойып, тұшымды жауап алды.
– Мұстафа Шоқай түркі дүниесінің ұлы тұлғасы саналады. Оның дәлелі ретінде, биыл Түркияның Мәдениет министрлігі «Түркияның 100 ұлы тұлғасы» арнайы сериясын бастады. Осы серияның алғашқы томдығына Мұстафа Шоқай еніп отыр. Сонымен қатар Францияда қайраткерге ескерткіш қойылып, саябақ ашылды. Сондықтан біз осындай ұлы тұлғаларымызды ұлықтай білсек, оның еліміз үшін де, ұрпағымыз үшін рухани пайдасы зор болады, – деді шоқайтанушы ғалым Әбдуақап Қара.
Сондай-ақ Нұртөре Жүсіп, Қазыбек Иса, Әбдіжәлел Бәкір және тағы басқа да зиялы қауым өкілдері ардақты азаматтың қайраткерлігі мен күрескерлігі туралы парасатты ой қозғады. Содан кейін тағылымды шара мектеп ұжымы дайындаған әдеби-сазды кешке ұласып, онда оқушылар көрнекті тұлға өмірінен шағын көрініс қойып, оның жары Мария Шоқайдың монологін оқыды. Кеш соңында аталған білім ордасына Мұстафа Шоқай есімінің берілуіне байланысты шығарған мектептің жаңа әнұраны орындалды.
