Павлодар облысында көліктік инфрақұрылымды дамыту жоспарланған

АСТАНА. 28 мамыр. Экономикалық ықпалдастық аясында Павлодар облысында көліктік инфрақұрылымды дамытуға зор көңіл бөлінгелі тұр. Бұл туралы Президент жанындағы Орталық коммуникациялар қызметінде өткен «Еуразиялық интеграция аясындағы өңіраралық өзара іс-қимыл мәселелері» атты брифингте Павлодар облысы әкімінің бірінші орынбасары Дүйсенбай Тұрғанов айтты. BNews.kz тілшісінің осыған орай хабарлауынша, бірыңғай көліктік орта қалыптастырудағы бұл қадамның берері мол. «Экономикалық ықпалдастықтың маңызды бағыты – бірыңғай көліктік орта қалыптастыру. Қазақстан Еуразия құрылығының ортасында орналасқан, яғни осы заманғы көліктік инфрақұрылымды қалыптастыру мен дамыту жұмысы жүргізіледі. Бізде Астана – Павлодар – Өскемен жаңа автомобиль жолы салынып жатыр. Омбы – Майқапшағай трассасы қайтадан жаңартылуда», - деді Д.Тұрғанбай. Павлодар қаласында көліктік-логистика терминалын салу жоспарланып отыр. Ол әлемдік талаптарға жауап беретін ірі қойма-терминал болмақ. «Осының барлығы Қазақстан және Ресей арасындағы жүк ағынын арттыруға мүмкіндік береді, жүк тасу уақытын қысқартады. Бүгінде бізде Мәскеу, Санкт-Петербор, Минск қалаларына дейін әуе бағыты жүзеге асырылып отыр. Біз қазір Омбы, Новосібір және Барнауылға әуе рейсін ашу жөнінде келіссөздер жүргізіп жатырмыз», - дегенді қосты ол. Мұрат Айтқожа. Дереккөз: Primeminister.kz. Фото: hvylya.org.