Еліміз экономикалық интеграцияға түсу жолының бастауында тұр

АСТАНА. 28 мамыр. Бүгін Астанада «Нұр Отан» партиясы Төрағасының бірінші орынбасары Бауыржан Байбек Л.Н.Гумилев атындағы Еуразия ұлттық университеттің профессорлық-оқытушылық құрамымен және студенттермен кездесті. Бұл туралы «ҚазАқпарат» хабарлады. Кездесуде Еуразиялық экономикалық одақтың құрылуы туралы және еліміздің болашақ дамуының әлеуеті талқыланды. Бауыржан Байбек: «Меніңше, Еуразиялық экономикалық одақты құру туралы тарихи шешімнің қарсаңында экономикалық ықпалдастықтың мүмкіндіктері мен келешегі төңірегінде талқылаулар жүргізу маңызды. Экономикалық ықпалдастыққа түсу барысында біз бұл тек жолдың бастапқы кезеңі ғана екенін түсінуіміз керек», – деді. Жиында Б.Байбек Мемлекет басшысы Нұрсұлтан Назарбаевтың осыдан 20 жыл бұрын атап өткен экономикалық интеграцияның негізгі принциптеріне де тоқталды. «Нұр Отан» партиясы Төрағасының бірінші орынбасары: «Сол кезде біздің Мемлекет  басшысы айтқан көптеген мәселелерді көпшілік жетесіне жетіп,  түсінген жоқ. Елбасы сол кезде ықпалдастықтың төрт басым бағытын атап өтті. Біріншіден, ол – прагматизм. Мемлекет пен халықтың мүдделерін ескеру арқылы тек қана экономикалық байланыстарды дамыту.  Екіншіден, Мемлекет басшысы көпдеңгейлі, көпжылдамдықты интеграцияны сөз етті. Үшіншіден, ықпалдастық ерікті, ашық және теңқұқылы болуы тиіс деді. Төртіншіге аймақтық қауіпсіздікті жатқызды.  Бүгін әлемде түрлі қауіп-қатерлер көп. Бірлесе жүріп, дамыған маңызды. Мына бәсекеге және тартысқа толы дүниеде жалғыз жүру қиын», – деді. Алдағы уақытта осындай жиындар республиканың барлық жоғары оқу орындарында өтеді деп күтілуде. Жолдыбай Базар. Дереккөз: «ҚазАқпарат». Фото: primeminister.kz.