– Мемлекет басшысының тапсырмасына сәйкес медицина саласының материалдық-техникалық базаны нығайтуға ерекше көңіл бөлініп отыр. Әсіресе халықтың өмірін сақтауда үлкен ықпалы тиетін жедел жәрдем қызметінің жеделдігін арттырудың маңызы зор. Санитарлық көлік паркін жаңартуға байланысты Жол картасын іске асыру мақсатында 20 жаңа көлік беріліп отыр. Облыстық жедел жәрдем қызметінің жаңа көліктермен толығуы аталған станса бригадаларының жеделдігін арттырады, – дейді облыс әкімінің орынбасары Жасұлан Бисембиев.
Облыстық медициналық жедел жəрдем стансасының директоры Азамат Ерболовтың мәліметінше, қаржылық лизинг шартына сәйкес «Hyundai Trans Auto» серіктестігінен «С» санатындағы 10, «В» санатымен 10 Hyundai H350 автокөлігі сатып алыныпты. Жақында 5 JAC көлігі жеткізіледі. Жаңа автокөліктер медицина қызметкерлерін шақыртуларға баруға, пациенттерді ауруханаларға жылдам жеткізуге, алғашқы медициналық көмекті сапалы көрсетуге мүмкіндік береді. Мәселен, коронавирус инфекциясының шарықтау кезеңінде жедел жәрдемге күніне 1 мыңнан аса қоңырау шалынған.
– Жедел жəрдем стансасының медициналық көлік паркі 2,5 есеге ұлғайды. Жаңа реанимобильдер алғашқы медициналық көмек көрсету үшін барлық қажетті жабдықпен жабдықталған. Оның ішінде озық үлгідегі дефибриллятор, жасанды тыныс алу аппараты, электрокардиограф (ЭКГ), тағы басқа неміс жəне италиялық медициналық жабдықтармен жабдықталған. Биыл жаңа ғимараттың құрылысы басталады. Алдағы жылы жедел жәрдем қызметкерлерінің жалақысын көтеру мəселесі көзделіп отыр, – дейді Азамат Ерболов.
Атырау облысы
