Еуразиялық экономикалық одақ біз үшін үлкен мүмкіндіктерге жол ашады

АСТАНА. 28 мамыр. Еуразиялық экономикалық ықпалдастық Солтүстік Қазақстан облысы кәсіпкерлерінің табысын еселей түсуде. Бұл туралы «24kz» хабарлады. Солтүстік Қазақстан облысында бір жылда 450 мың тонна сүт өңделеді. Бұдан біз аймақтың кәсіпкерлерінің жұмысы қарқын алғанын аңғарамыз. Осы арада ерекше тоқтала кетер жәйт, Петропавлдағы сүт зауытынан шығарылған өнімнің 30 пайызын көрші Ресей елі сатып алады. Бүгінде осы зауытта  220 адам тұрақты түрде жұмыспен қамтылған. Олар тәулігіне 300 тонна таза өнім шығарады. Зауыт директоры Роза Сүлейменова: «Ең бастысы, сүттің сапасына назар аударамыз. Өнімді облыс көлеміндегі шағын қожалықтардан, ірі кәсіпорындардан аламыз. Бәсекеден қорықпаймыз. Еуразиялық экономикалық одақ біз үшін үлкен мүмкіндіктерге жол ашып беріп отыр», – деді. Бұл өндіріс орны «Үдемелі индустриалды-инновациялық даму» бағдарламасы бойынша соңғы үлгідегі технологиямен жабдықталған. Сондықтан да, зауыт өнімінің сапасы жақсарып, бәсекеге қабілеттілігі артқан. Жолдыбай Базар. Дереккөз: «24kz». Фото: strategy2050.kz.