Еуразиялық экономикалық одақтың құрылуы бизнесті дамытуға оңтайлы әсер етеді

АСТАНА. 29 мамыр. Мемлекет басшысының биылғы жылдың 28 сәуірінде М.В.Ломоносов атындағы Мәскеу мемлекеттік университетінде оқыған дәрісін әлем сарапшылар, әсіресе, Еуропа одағы мұқият зерттеуде. Бұл туралы «ҚазАқпарат» хабарлады. Мәселен, Брюссельде қазақстандық журналистерге берген сұхбатында еуропалық алдыңғы қатарлы сарапшы, «Шығыс-Батыс» институтының ғылыми қызметкері Данил Бочкарев: «Президент Нұрсұлтан Назарбаевтың биылғы дәрісі ықпалдастық үдерістер жайындағы ММУ-дегі бірінші дәрісінен кейін 20 жылдан соң болды. Нұрсұлтан Назарбаевтың болашақты ғылыми тұрғыдан болжау дарыны мен саяси даналығы оны еуразиялық интеграцияның архитекторы ретінде көрсетті. Енді ертең Еуразиялық экономикалық одақты құру туралы келісімге қол қою рәсімі өтпек. Бұл қозғалыс дұрыс бағытта келе жатыр», – деді. Еуропалық сарапшының айтуынша, орта және шағын елдерге ірі мемлекеттермен бірлеспей өмір сүру өте қиынға соғады. Данил Бочкарев: «Біз осындай интеграциялық үдерістер Азияда басталғанын көріп отырмыз. Сонымен қатар бұндай қадамдар Солтүстік Америкада да, Латын Америкасында да жүріп жатыр. Бұл жалпыәлемдік трендтердің бөлігі. Осы шаралар азиялық нарықта төтеп беруге, сондай-ақ, Еуропалық одақпен өзінің келіссөздер ұстанымын нығайтуға көмектеседі», – деді. Жалпы, Данил Бочкаревтің пікірінше, Еуразиялық экономикалық одақ құрудың ішкі мәнінде бірқатар экономикалық алғышарттар мен басымдықтар бар. Тез өзгеріске ұшырайтын әлемде және халықаралық бәсекелестіктің күшеюі жағдайында аталған одақты құру қатысушы мемлекеттерге пайдасын тигізеді. Жолдыбай Базар. Дереккөз: «ҚазАқпарат». Фото: «24kz».