«Астанада соңғы жылдары шорт-трек, мәнерлеп сырғанау, хоккей секілді спорт түрлері жақсы дамып келеді. Аталған чемпионаттың елордада өтуі, Астаналық спортшылар үшін үлкен нәтиже. Екінші жыл қатарынан өткізіліп отырған қалалық ашық чемпионатқа өзге де қалардан келіп қатысуда. Үш күнге созылатын жарыс қысқа және еркін бағдарлама бойынша өтіп жатыр. Бұл жарыста жұптық бәсеке жоқ. Бүгін «Алау» мұзайдыны сарайында мәнерлеп сырғанаудан «ASTANA OPEN» қалалық ашық чемпионатының алғашқы күнгі жеңімпаздары анықталды», дейді қалалық дене шынықтыру және спорт басқармасының баспасөз хатшысы Мадина Айтқалиева.
Ұйымдастырушылардың айтуынша жеке разрядтағы жарыстар Халықаралық конькишілер одағының талаптарына сәйкес өтеді. Балалар мен жасөспірімдер, сондай-ақ спорт шебері мен спорт шеберіне үміткерлердің өнерін арнайы шақырылған халықаралық төрешілер бағалайды.
Бүгін жарыс аланыңа спорт шеберлері мен спорт шеберіне үміткер ұл-қыздар шығады.
Айта кетейік, чемпионат қорытындысы бойынша Қазақстан Республикасының жастар чемпионатына 24 ең мықты спортшыдан Астана қаласының құрама командасы жасақталады.
«Бұл жарыста біз ең мықты деген елордалық спортшылар арасынан 24 таңдаулы мәнерлеп сырғанаушыны Астана қаласының құрама командасына қабылдаймыз. Олар алдағы 20-24 қараша аралығында Өскемен қаласында өтетін мәнерлеп сырғанаудан ҚР жастар чемпионатында өнер көрсетеді. Сондықтан республикалық аренада қаламызды лайықты танытатын мықты команданы таңдау біз үшін өте маңызды», дейді Астана қаласының мәнерлеп сырғанау федерациясының президенті Эльмира Тұрғанова.
Жарыс 16 қарашаға дейін жалғасады. Көрермендер мен жанкүйерлер үшін кіру тегін.
