«Қазгидромет» РМК ақпаратына қарағанда, елдің басым бөлігінде жаңбыр мен қар түріндегі жауын- шашын күтіледі.
«Республика бойынша тұман, көктайғақ болады. Ал батыста, солтүстік-батыста, солтүстікте, оңтүстікте, оңтүстік-шығыста жел күшейеді. Сондай-ақ Қазақстанның солтүстігінде, солтүстік-батысында боран күтіледі. Жетісу облысының солтүстік-шығысында желдің күшейіп, екпіні 23-28 м/с дейін жетеді», делінген хабарламада.
Астанада ауыспалы бұлттылық сақталып, күндіз жауын-шашын күтіледі. Оңтүстік-шығыстан жел соғып, түнде 2-7, күндіз 9-14 м/с болады. Түнде ауа температурасы -12...-14°С, күндіз -3...-5°С.
Алматыда күн бұлтты болып, түнде аздаған жауын-шашын күтіледі. Түнде және таңертең тұман түседі. Түнде ауа температурасы +2...+ 4°С, күн +9...+11°С.
Шымкентте күн жауын-шашынсыз өтсе де ауыспалы бұлттылық сақталады. Оңтүстік-шығыстан соққан желдің екпіні 5-10 м/с дейін жетеді. Түнде ауа температурасы +5...+7°С, күн + 17...+19°С.
