Қаржы • 25 Қараша, 2022

Білім депозитін сақтандыру

35 рет көрсетілді

Қазіргі кезде банк және сақтандыру өнімдері тек ақшаны сақтайтын және өмірді қорғайтын емес, сонымен бірге ақша жинап, көбейтетін функцияға да ие болып жатыр. Бірте-бірте инвестициялау сақтандыру нарығына біржола кірігіп кететін сыңайлы. Бұл ретте Мемлекеттік білім беру жинақтау жүйесін (МБЖЖ) атап өтсек болады.

Қаржы нарығын реттеу және да­мыту агенттігінің хабарлауынша, осы бағдарлама арқылы кез кел­ген ата-ана Қазақстанда немесе шет­елде кәсіптік және жоғары оқу орын­дарының ақысын төлеуге жет­кі­лікті ақша жинай алады. Қазір МБЖЖ бағдарламасына 4 екінші дең­гейлі банк қатысып жатыр. Оларда 33,5 млрд теңге қаржысы бар 22 мың­нан­ астам білім беру депозиттері ашылған.

Мұндай инвестициялық өнімді банктермен қатар сақтандыру ұйым­дары да ұсынады. МЖББ шең­берінде білім беру жинақтаушы өмір­ді сақтандыру шартына қол қою арқылы ата-аналар сақтандыру ұйы­мы есептеген инвестициялық кіріс­тен басқа жылына 5 пайыз мемлекет сыйлықақысын ала отырып, бала­лар­ының оқуы үшін жинақтауға мүмкіндік алады (халықтың басым санатына, мысалы, жетімдерге, мүгедектерге, көпбалалы отбасы балаларына – жылына 7 пайыз).

Бұл сақтандыру өнімінің бірнеше артықшылығы бар. Біріншіден, депо­зиттен айырмашылығы (8 пайыздан 10 пайызға дейін) сақтандыру шарты­ның барлық мерзімінде кіріс­тілік мөл­шерлемесіне кепілдік беріледі. Екіншіден, Сақтандыру тө­леміне кепілдік беру қоры барлық жиналған соманы толығымен жабады. Ал Қазақстан депозиттерге кепілдік беру қоры тек 20 млн теңгеге дейінгі сомаларды төлеп бе­реді. Үшіншіден, ата-анасы ең­бек қабілетінен айырылған немесе қайтыс болған жағдайда жи­нақ­талған сома мөлшеріне қара­мас­тан оқу құны толығымен төленеді.

Білім беру жинақтау сақтандыру өнімін енгізу көптеген ата-ананың өз баласының оқуы үшін қаржы жинауына мүмкіндік береді. Бұл – мемлекет тарапынан субсидияланатын алғашқы сақтандыру өнімі.

Еске салайық, 2022 жылдың 12 қыр­күйегінде сақтандыру ұйым­дары­ның МБЖЖ бағдарламасына қатысуына мүмкіндік беретін өз­ге­рістер жасалды.

Соңғы жаңалықтар

Ұқсас жаңалықтар