Кеше Мемлекеттік хатшы – Сыртқы істер министрі Қанат Саудабаевтың төрағалығымен Мемлекеттік рәміздер жөніндегі республикалық комиссияның кезекті мәжілісі болып өтті. Аталған мәжіліс жұмысына комиссия мүшелері, Парламент депутаттары, уәкілетті мемлекеттік органдар мен қоғамдық ұйымдардың өкілдері қатысты.
Елімізде мемлекеттік рәміздерді пайдалану және оларды қолдану саласында көптеген жұмыстар атқарылды. Бүгінде оларды тек ел ішінде ғана емес, бүкіл әлем біледі десек артық емес. Бұған Елбасы да ерекше мән береді. Сондықтан да комиссияның бүгінгі отырысы Мемлекеттік рәміздер күні мен Конституцияның 15 жылдығының қарсаңында өтіп отыр. Бұл айрықша мәні бар сәттер еліміздің тарихындағы елеулі кезеңдерге айналғаны ақиқат. Өткен 18 жыл барысында мемлекеттік рәміздер елімізді танытудың және шетелге де тәуелсіз Қазақстанның гүлденуінің шынайы шындығын көрсетудің көрінісі болды, деді Қанат Саудабаев.
Мемлекеттік рәміздеріміздің маңызы одан әрі арта беруі үшін оны пайдалану жөніндегі жұмыстар жандана түсуге тиіс. Осыған орай отырыс барысында Алматы қаласының, Қостанай және Қызылорда облыстары әкімдерінің, сондай-ақ Төтенше жағдайлар министрлігі мен Экономикалық қылмысқа және сыбайлас жемқорлыққа қарсы күрес агенттігінің мемлекеттік рәміздерді пайдалану және қолдану бойынша жұмыс тәжірибелері жөніндегі есептері тыңдалды.
Қ.Саудабаев рәміздерді пайдалану және қолдану саласында иек артқан әрі белгіленген жұмыстардың арқасында қол жеткен нәтижелерге қарамастан, кемшіліктер мен мемлекеттік рәміздерді тиісінше қалыптасқан ережелерге сай пайдаланбау деректері кездесетінін айтты. Осыған орай отырыста мемлекеттік рәміздерді насихаттау жастарға патриоттық тәрбие беруде аса маңызды рөл атқаратыны ерекше аталды.
Мәжіліс соңында комиссия отырысының қорытындысы бойынша хаттамалық шешім қабылданды және мемлекеттік органдарға мемлекеттік рәміздер жөніндегі заңнама қағидаларын бұлжытпай сақтау, сондай-ақ оларды пайдалануды бақылаудың тетіктерін жетілдіру туралы нақты тапсырмалар берілді.
Александр ТАСБОЛАТОВ.