Пікір • 28 Қараша, 2022

Көңілге үміт сыйлаған Жарлық

250 рет
көрсетілді
2 мин
оқу үшін

Мемлекет басшысы Қасым-Жомарт Тоқаевтың ұлықтау рәсімінде сөйлеген сөзін бастан-аяқ тыңдап шықтым. Қадау-қадау мәселелер көтеріліп, алда атқарылатын маңызды міндеттер айқындалды. Мен соның біреуіне ғана, бүгінде қалаға тұрақтаған көп қазақтың алтын бесігі – ауылдың тағдырына қатысты мәселеге тоқталайын.

Көңілге үміт сыйлаған Жарлық

Президент ауылдағы жағдайды жақсарта алмасақ, бәрімізге үлкен сын болатынын қадап айтып, ең алдымен ауылды дамыту мәселесі туралы Жар­лыққа қол қойды және Үкіметке ауыл­ды дамытудың 2023-2027 жылдарға ар­нал­ған нақты жоспарын әзірлеуді тапсырды.

Ауылды көркейту мақсатында бұған дейін де көп бағдарлама болғанын көп­шілік көріп-біліп отыр. Бірақ нәтижесі мардымсыз. Осы орайда, Президенттің алдымен ауылдың әлеуетін көтеруді ең бірінші мәселе етіп көтеруі көңілге үлкен үміт ұялатты.

Біз – Қостанай облысының диқанда­ры Президентті толық қолдаймыз. Өйт­кені ауыл шаруашылығы ауылсыз ілге­ріл­мейді. Мемлекет басшысы бізді алаң­датқан мәселерді дөп басып айтты.

Қазақтың рухы, салт-дәстүрі, кәсібі мен несібесі, әлі де болса, ауылда жа­тыр. Сондықтан Мемлекет басшысы дұ­рыс мәселе көтеріп отыр. Ең бірінші мәселе, ауылды жақсарту үшін – ауылда тұратын халық болу керек. Ал халықты ауыл­ға апару үшін елді мекендердің инфра­құрылымын дұрыстау қажет. Су, жол мәселесі бірте-бірте шешілер, бірақ ең бастысы, ауылға газ тарту керек. Газсыз ауыл дамымайды. Талай ауыл­ды көрдік, суы бар, жолы бар. Сонда да, көгілдір отыны жоқ болған соң, халқы қалаға қарай тартып тұрады.

Тағы бір үлкен мәселе, ауылдан шы­ғатын ауылшаруашылық өнімдері ауылда өңделуі керек. Өңдеу өнер­кәсібі дамыған ауылға адам да барады, мал да бітеді, жұмыс та болады.

Президент бүгінде халықтың 40 пайызы ауылда тұратынын атап өтті, бұл аз емес. Қалай айтсақ та, мал ұстап, егін егу – біздің қанымызда бар, сүйексіңді ата кәсібіміз. Бүгін бәріміз қалаға көшіп кетсек, ертең мынау үлкен-үлкен алқаптарға кім ие болмақ? Әсіресе, шекара түбіндегі ауылдарды дамыту маңызды. Бұл ауылдарда халық көп болуы керек.

Тоқ етерін айтқанда, мені Қасым-Жомарт Кемелұлының бұл жолғы сайлау нәтижесін өзіне жүктелген үлкен жауапкершілік ретінде қабылдағаны және мәселенің басын ауылдан бастағаны қуантады.

 

Сайран БҰҚАНОВ,

Қазақстанның Еңбек Ері

 

Қостанай облысы,

Меңдіқара ауданы,

Харьков ауылы