Қазақстан грек-рим, еркін және әйелдер күресі федерациясының мәліметінше, 30 қарашада Лаураға United World Wrestling ұйымынан хат келіпті. Онда «Бішкек Арена» кілемінде өткен финалдық белдесуде қазақ палуанын ұтып, Азияның алтын медалін иеленген үндістандық спортшының допингке қарсы талаптарды бұзғаны анықталды деп жазылған.
21 мемлекеттің спортшылары бақ сынасқан дүбірлі додада Лаура Әлмағанбетова күміс медаль алған еді. Қола қырғыз спортшысына бұйырған.
Қостанайлық палуан қазір Қарағандыда Нұркен Әбдіровті еске алуға арналған республикалық турнирде жүр екен.
– Ойда жоқта алтын медаль алғанымды естіп, өзім де таңғалып жатырмын. Бірақ Бішкекте үнді палуанын ұтуым керек еді, қуаныштың көкесі сол болар еді. Әрине, спорттың аты – спорт, бірде ұтасың, бірде ұтыласың. Алтын алғанымды естіп туыстарым да қуанып жатыр. Ендігі басты мақсатым – келесі жылы басталатын олимпиадалық іріктеу жарыстарына дайындалу, – дейді палуан қыз.
Лаура 2004 жылдан бері Сарыкөл аудандық балалар және жасөспірімдер спорт мектебінде жаттығады. Спорт шебері, Қазақстан Республикасының алты дүркін чемпионы, Азия чемпионатының екі дүркін күміс, Әлем чемпионатының қола жүлдегері.
Қазақ палуаны енді 57 кило салмақ дәрежесі бойынша Азияның алтын медалін алатын болды.
Қостанай облысы
