Жетісу облысы әкімдігі баспасөз қызметінің мәліметіне сүйенсек, биыл аймақта асыл тұқымды малдың үлесі 20,2 пайызға көбейген. Осы бағыт бойынша 523 шаруашылық 1 млрд теңгеден астам субсидия алған екен. Бүгінде қосымша өтінім бергендер әлі де бар. Осы ретте Кербұлақ ауданындағы шаруаларды мысалға ала кетсек. Мұнда ірі қара саны 65 мыңнан асады. Ал ұсақ мал 324 мыңға, жылқы саны 23 мыңға жетеді. 71 мыңдай құс бар. Ауданда 2 400-дей шаруашылық ауыл агро салада еңбек етеді. Соның ішінде асыл тұқымды мал өсіруге ерекше көңіл бөлінеді. 22 шаруа қожалығы 2 400 бас асыл тұқымды ірі қара, 2 500 бас асыл тұқымды ұсақ мал өсіріп отыр. Сол қатарда асылдандырумен айналысып жүрген фермердің бірі – Жанат Омаров.
Аталған қожалық 1993 жылы құрылған. Қазір онда жалпы аумағы 1 814 гектардан астам жер бар. Соның 921 гектары – егістік, жайылымдық және шабындық жері – 893 гектар. Биыл 771 гектар жерге күздік бидай, 729 гектарға арпа себілген. Жалпы, шығымдылығы әр гектарына 21 центнерден айналды. Шаруашылықта 140 бас қой, 300 бас ірі қара, 100 жылқы бар. Оған қоса тауық, күркетауық, үйрек асырайды. Қысқы мал азығы ретінде 500 тонна шөп, 200 тонна сабан дайындалған. Мұнда сиырдың «Әулиекөл» тұқымын өсіру қолға алынған.
Шаруа қожалығының басшысы Жанат Омаровтың айтуынша, әр екі жыл сайын төл жаңарту жұмыстары жүргізіледі.
«Асыл тұқымды мал өсірумен айналысқаныма он жылдай болды. Бастапқыда 30 бас құнажын мен Әулиекөл тұқымды бұқа сатып алдық. Қазір асыл тұқымды мал басы 150-ге жетті. Шағын бордақы алаңымыз бар, онда сатуға қойылатын 60-70 басты ұстаймыз, 20-30-ын қысқа қалдырамыз. Тұқымның тазалығын сақтау үшін екі жыл сайын мал басын жаңалап сатып алып отырамыз. Соның нәтижесінде бордақыланған бір бұқадан 350 килоға дейін таза ет аламыз», деді Ж.Омаров.
Жалпы, өткен 9 айда Кербұлақ ауданында 6 990,7 тонна ет, 37 мың тоннадай сүт, 6 мың данадай жұмыртқа өндірілген. Сондай-ақ 213 мыңдай тонна шөп жиналған. Фермердің айтуынша, ауыл шаруашылығының ең басты проблемаларының бірі – кадр мәселесі. Жақсы маман табу қиынның қиыны көрінеді.
«Қазір агроөнеркәсіп кешенінде негізінен аға ұрпақ еңбек етеді, ауыл шаруашылығына жастардың да қызығушылығын арттырумыз керек. Агроном, механизатор, комбайншы, тракторшы, ветеринар мамандықтарын меңгерсе деймін. Бізде осы мамандықтардың бәрі сұраныста. Бұлар тұрақты табысы бар мамандықтар, тиісті әлеуметтік жеңілдіктері де бар. Ауыл шаруашылығында мемлекеттің қолдауынсыз оңай емес. Әсіресе минералды тыңайтқыштар, тұқым, жанар-жағармай, гербицид, техника бөлшектері – бәрінің бағасы өсіп жатқан қазіргі уақытта мұндай қолдаудың көмегі бізге едәуір», деді Ж.Омаров.
Жалпы, биыл көктемгі дала жұмыстарына ауданға жеңілдік бағамен 1 600 тонна қажетті жанар-жағармай бөлінген. Жыл басынан бері машина-трактор парктерін жаңарту үшін 954 млн теңгеге 40 бірлік арнайы техника сатып алынған. Атап айтсақ, 20 трактор, 6 комбайн шаруалардың игілігіне жараған.
Бүгінде Кербұлақта 4 сервистік дайындау орталығы жұмыс істейді. Онда құны 1,6 млрд теңге болатын 43 бірлік ауыл шаруашылығы техникасы бар. Өткен тоғыз айда ауыл шаруашылығында 47,6 млрд теңгенің өнімі өндірілген. Бұл ретте нақты көлем индексі – 101,4 пайыз.
Жетісу облысы
