Іскерлік байланыстарды қолдайды

Облыстың кәсіпкерлер палатасы бизнес өкілдеріне түрлі мәселелер бойынша көмек беру үрдісін қалыптастыруда. Палата өз өнімдерін шетелдерге экспортқа шығаруды көздейтін кәсіпкерлерге ықпал етуге дайын. Бұл мекеменің сарапшылары тауар өндірушілердің деректер базасын құрады, Кеден одағына кіретін елдердің және алыс шетелдердің нарығын талдайды. Облыстың кәсіпкерлер палатасының халықаралық және өңіраралық ынтымақтастық жөніндегі сарапшысы Айнұр Баймұратованың айтуынша, компаниялар сыртқы нарықта қандай өнімдерге сұраныс барын біле бермейді, қандай өнімдерді экспортқа шығаруға болатынынан да бейхабар болып келеді. Сондай-ақ, шетелдік компаниялар да Қазақстанның экспорттық әлеуетін жетік білмейді. – Біз ақтөбелік кәсіпкерлерге жаңа іскерлік қарым-қатынастар орнатуға көмектесуге әзірміз, – дейді ол. Өткен жылы облыстың сыртқы сауда айналымы 9918,8 миллиард АҚШ доллары болды. Оның негізгі үлесін 8420,8 миллиард АҚШ доллары болатын тауар экспорты құрады. Экспортқа негізінен шикі мұнай, хром және мыс кені, хром тұздары шығарылды. Ақтөбеде шығарылған өнімдер Қытайға, Жапонияға, Италияға, Австрияға және басқа да елдерге экспортталды. Сатыбалды СӘУІРБАЙ, «Егемен Қазақстан».