![Ең қымбат қазына](/media/2022/12/18/2019_12_11_unicef-bambini-900x_.png)
Жалпы, аталған комиссия өкілдері адам саудасына қарсы күрес іс-шараларын жүйелі жүргізіп келеді. Елімізде алғаш рет Адам саудасына қарсы күрес туралы заң жобасы әзірленіп жатқанын ескерсек, бұған комиссия мүшелерінің қосқан үлесі зор. 2023 жылдың сәуір айында заң жобасы Мәжілістің талқылауына ұсынылмақ.
Елімізде адам саудасының ең көп таралған түрі – әйелдерді жыныстық қанау, сондай-ақ притондар ұйымдастыру мен жеңгетайлық жасау. Ер адамдар әдетте, еңбек нарығында жапа шегеді. Сонымен қатар жаңа туған нәрестелер мен жас балаларды сату фактілері де азаймай тұр. Президент жанындағы Адам құқықтары жөніндегі комиссияның хатшысы Тастемір Әбішевтің айтуынша, заң жобасында шетелдік мигранттардың еңбек қатынастарын реттеу мәселесі қарастырылып, өзге де маңызды бағыттар қамтылған. Заң қолданысқа енгізілсе, адам құқығы туралы ережелер халықаралық стандарттарға сай болмақ. Адам саудасының алдын алу және аталған қылмысқа қарсы ымырасыз күресте әлемдік тәжірибенің маңызы зор.
Елімізде 2016 жылдан бері адам саудасының құрбандарына атаулы әлеуметтік көмек көрсетіледі. Алайда бұл көмекті тек Қазақстан азаматтары, елімізде тұрғылықты тұрып жатқан шетелдік азаматтар мен қандастар ала алады. Ал түрлі себептермен Қазақстанға уақытша келген еңбек мигранттары адам саудасының құрбаны болғанда бұл көмектен қағылады. Халықаралық сарапшылар бұл мәселені жиі көтеріп жүр. Жалпы, бұл бағыттағы заңнамалық құжаттардың болмауы Қазақстанның кейбір халықаралық рейтингтерде төменгі сатыдан көрінуіне түрткі болғаны рас. Білікті мамандардың қатысуымен әзірленіп жатқан заң жобасы осы сияқты түйткілдердің түйінін тарқатады деген сенім мол.
Дөңгелек үстелге адам құқығын қорғау іс-шараларда белсенділік танытып жүрген сарапшылар шақырылып, олар өз ойларын ортаға салды. Жиында елімізде заң үстемдігін қалыптастыру мен құқық қорғау институттарын жетілдіруге басымдық беріліп отырғаны айтылды. Құқықтық мемлекеттің қалыптасуы адам бостандығын сақтаумен тікелей байланысты. Жиналғандар адам құқықтарын халықаралық стандарттарға сәйкес қорғаудың ұлттық тетіктерін жетілдіру, салада қолға алынып жатқан реформалар төңірегінде пікір алмасты.
Тастемір Әбішевтің айтуынша, мұндай кездесулер жыл сайын өткізіліп тұрады. Бұл жастардың ой-өрісін кеңейтумен бірге болашақта заң саласында жұмыс істеуде қажетті дағдыларды меңгеруге мүмкіндік береді. «Енді Қазақстанның азаматтары ғана емес, елімізде тұрақты немесе уақытша тұрып жатқан шетелдіктер, азаматтығы жоқ адамдар, босқындар, қандастар, азаматтықты алып үлгермегендер де Конституциялық сотқа жүгінуге құқылы. Мысалы, менің құқықтарым бар болғанымен, мемлекет пен қоғам алдында міндеттерімді де ұмытпауым керек», деді Т.Әбішев.