![Қорытынды жиын](/media/2022/12/19/partiya-amanat.jpg)
– «Өзгерістер жолы: Әр азаматқа лайықты өмір!» деп аталатын партиялық бағдарламаның басымдығы – халықтың өмір сүру сапасын арттыру, әлеуметтік әділеттілікті қамтамасыз ету, есеп беретін және халық үніне құлақ асатын мемлекет құру. Бағдарламаны іске асыруға барлығы 21 трлн теңге тарту жоспарланған. Оның қаржылық және адами ресурстармен қамтамасыз етілген биік мақсаты, байыпты бағдары бар, – деді А.Платонов.
Бүгінде сайлауалды бағдарламаны іске асыру шеңберінде ел аумағында 90 мектеп пайдалануға берілді. Сонымен қатар 259 балабақша ашылып, 180 колледжде жаңғырту жұмысы жүргізілген. Бұған қоса 11,7 млн шаршы метр тұрғын үй (100 мыңға жуық баспана) салынып, 500 мыңға жуық жұмыс орны құрылды.
Жуырда Мемлекет басшысы Қасым-Жомарт Тоқаев Үкіметтің кеңейтілген отырысында биыл 11 айда экономика өсімі 4,6%-дан 2,7%-ға дейін баяулағанын, ал инфляция соңғы 14 жылда болмаған деңгейге жетіп, 19,6%-ды құрағанын мәлімдеген еді. Ел экономикасындағы осындай жағымсыз жағдай партияның сайлауалды бағдарламасын іске асыру сапасына тікелей әсер етеді.
Ұлттық экономика министрі Әлібек Қуантыровтың айтуынша, биыл жоспарланған 18 млн шаршы метр тұрғын үйдің жыл соңына дейін 15,1 млн шаршы метрі (137,7 мың баспана) салынады.
«Шамамен 3 млн шаршы метрді салып үлгере алмай жатырмыз. Бұған жұмыс кестесінен артта қалу, қаржыландырудың жеткіліксіздігі себеп болып отыр. Алайда ең басты кедергі – құрылыс материалдарының қымбаттауы. Белгілі бір деңгейде импортқа тәуелділік болғандықтан, елге құрылыс материалдарын жеткізу кезінде қиындықтар орын алды», деді министр.
2022 жылы атқарылған жұмысты қорытындылай келе, Артур Платонов биыл комитет орталық және жергілікті атқарушы органдарға 200-ден аса нақты ұсыныс бергенін атап өтті. Жергілікті жерлерде партиялық бақылау комиссияларымен бірлесіп еңбек ұжымдарымен, тұрғындармен, қоғам қайраткерлерімен және тағы басқалармен 600-ден аса дөңгелек үстел, 1 100-ден аса кездесу, сондай-ақ 5 мыңнан аса көшпелі отырыс пен рейд өткізілген.
«Азық-түлік тауарлары, дәрілік заттар және жанар-жағармай бағасының өзгеруіне бақылау жүргізу бойынша 216 мониторинг тобының жұмысын ерекше атап өткім келеді. Бұл жұмыс тұрғындардың оң бағасын алды. Сондай-ақ партиялық бақылау бекетін құру жұмысы қолға алынды», деді А.Платонов.
Биыл Әдеп кодексін бұзғаны үшін 104 партия мүшесі, оның ішінде қала және аудан әкімдері, олардың орынбасарлары, орталық және жергілікті мемлекеттік органдардың департамент және басқарма басшылары, түрлі деңгейдегі мәслихаттардың 22 депутаты жауапкершілікке тартылғанын атап өткен жөн.