Сырым Датұлы даңғылының бойында жаңадан жасақталған әдемі алаң қала тұрғындары мен қонақтары серуендеп, демалыс уақытын тиімді өткізуге болатын әдемі мүйіске айналған. Қаламгерлер атын иеленген алаңның ашылуына Батыс Қазақстан облысының әкімі Нариман Төреғалиев, Орал қаласының әкімі Миржан Сатқанов, Қазақстан Жазушылар одағы облыстық филиалының жетекшісі, Қадыр Мырза Әлі атындағы өнер мен мәдениет сарайының директоры Бауыржан Халиолла және жергілікті ақын-жазушылар қатысты.
– Қоғамда ақын-жазушылар мен ұлт зиялыларының орны ерекше. Сондықтан қаламгерлердің қадір-қасиетін арттырып, төрден түсірмей құрметтеген елміз. Бүгінгі ашылып жатқан «Қаламгерлер алаңы» да сол сөзіміздің жарқын бір мысалы. Ал, арнайы қойылған белгітас – дүниеден өткен ақын-жазушылардың рухына тағзым, – деп атап өтті өңір басшысы.
Бұл айтулы оқиғаға орай Қазақстан Жазушылар одағы басқармасының төрағасы Ұлықбек Есдәулет пен Қазақстан Жазушылар одағының басқарма хатшысы, Астана филиалының директоры Дәулеткерей Кәпұлы құттықтау хат жолдаған екен.
Іс-шара соңынан өңір басшысы жергілікті қаламгер қауыммен дастарқан басында жүздесіп, көптеген сұраққа жауап берді. Облыс әкімі қызметіне жақында ғана тағайындалған Нариман Төреғалиұлы Мемлекет басшысы ұсынып отырған «Әділетті мемлекет – Әділетті экономика – Әділетті қоғам» тұжырымдамасын жүзеге асырудың мәні мен маңызына тоқталып, Ақ Жайықтың ақын-жазушыларын осы жолда жұмыла қызмет етуге шақырды.
Батыс Қазақстан облысы
