Ақпараттар ағыны

● «Самұрық-Қазына» биыл құны 3 млрд. долларды құрайтын 16 жобаны iске қосады. Қазірдің өзiнде мұн­да 10 мың жұмыс орны құ­рылған. Ал 2015-2016 жылдары 23 млрд. долларлық 40 жоба жүзеге асып, оған 9,5 мың жұмыс қолы тартылады. ● Жезқазған кен орын­дарындағы геологиялық бар­лау жұмыстарына 25,1 млрд. теңге бөлінеді. Ол Жез­қаз­ған, Сәтбаев қалалары мен Ұлытау ауданын әлеуметтік-экономикалық дамытудың 2012-2020 жылдарға арналған кешенді жоспары аясында атқарылатын шараларды қаржыландырады. ● Күршім ауданында Отан соғысы ардагерлеріне арналған форум аяқталды. Шығыс Қазақстан облысының әкімі Бердібек Сапарбаевтың бастамасымен қолға алынған шара енді аймақтың басқа өңірлерінде өзінің жалғасын тауып, Ұлы Жеңістің 70 жыл­­дығы қарсаңында қоры­тындысын шығарады. ● Қызылордада Сыр­дария өзені үстіндегі жаңа көпірдің құрылысы бас­талды. Кеше іргетасы қа­лан­­ған бұл шараға облыс әкімі Қырымбек Көшербаев қа­тысып, жаңа өткел дария­ның сол жағалауын дамыту ісі­нің бастауы болатынын айт­ты. Нысан құрылысы аяқ­та­лысымен, өзеннің қарсы бетінде жаңа зәулім ғима­раттар бой көтеретін болады. ● Шымкенттегі Қошқар- ата өзенінде жаңа демалыс орны қатарға қосылды.  Оның салтанатты ашылу рәсіміне қатысқан облыс әкімі Асқар Мырзахметов 12 гектар аумақты алатын мекендегі арна бойымен балалар және спорт алаңдары келушілерге қызмет ететінін әңгімеледі. ● Қостанайда «Агро­биз­нес-2020» бағдар­лама­сына несие берудің тұсау­ке­сері өтті. Облыста бұл са­­лада қой және жылқы ша­руа­­шылықтарын дамыту ба­сыңқы бағыт алып отыр. Несие сызбасында мәселенің осы жағы ескерілді. ● Алматыда 18 970 бала жазғы лагерьлерде демала­тын болды. Бұлардың бәрі бірінші сауықтыру кезеңінде мектеп жанындағы тынығу мекендеріне барады. Олардың ішінде 156 лагерьде 11 632 бала ыстық тамақпен, 8 лагерьде 834 бала күндізгі ұйқымен, 19 лагерьде 7 338 бала ойын алаңымен қам­тыл­ған. ● Жамбыл облысының әкімі отбасы тектес бала­лар үйіне шағын автобус сыйлады. Осыған разы бол­ған 15 балалы мекеннің ие­лері, ерлі-зайыпты Алексей және Наталья Тимофеевтер Кәрім Көкірекбаевқа алғыс сезімдерін білдірді. «ҚазАқпарат», BNews.kz, Аltaynews.kz, Аlau.kz, Egemen.kz агенттіктері мен «Знамя труда» деректері бойынша дайындалды.