Павлодар облысы әкімдігіне қарасты екі басқармаға жаңа басшы тағайындалды

АСТАНА. 9 маусым. Павлодар облысының әкімі Қанат Бозымбаевтың өкімімен облыстық кәсіпкерлік, сауда және туризм басқармасына Александр Бабенко, ал сәулет және қала құрылысы басқармасына Андрей Балашев басшы болып тағайындалды. Бұл туралы «ҚазАқпарат» хабарлады. Павлодар облысының тумасы, жоғары білімді, Қарағанды КСРО ІІМ Жоғары мектебін және Ресей Федерациясы үкіметінің жанындағы Халықтық шаруашылық академиясын тәмамдаған Александр Бабенко еңбек жолын Ішкі істер министрілігінің қызметкері ретінде бастаған. Сондай-ақ, 20 жылдан астам кәсіпкерлік және бизнес саласында еңбек етті. Бұдан бөлек, А. Бабенко Инновациялық Еуразиялық университеттің «Менеджмент» кафедрасының профессоры. Ол осы тағайындауға дейін облыстық кәсіпкерлік, сауда және туризм басқармасы басшысының орынбасары болған. Облыстық сәулет және қала құрылысы басқармасының басшысы болып бекітілген Андрей Балашев бұған дейін Павлодар қаласының сәулет және қала құрылысы  бөлімін басқарған. Павлодар облысының тумасы, жоғары білімді, 2003 жылы инженер-құрылысшы мамандығы бойынша С. Торайғыров атындағы Павлодар мемлекеттік университетін үздік аяқтаған А.Балашев еңбек жолын «Архпроект-Т» ЖШС-да жобалушы болып бастаған. Содан кейін облыстың сәулет және қала құрылысы басқармасы бөлімінің бас маманы, бастығы, Павлодар қаласының бас сәулетшісі міндеттерін атқарған. Сондай-ақ, Қанат Бозымбаевтың өкімімен облыс әкімі аппараты басшысының орынбасары болып Ағыбай Әмрин тағайындалды. Ол бұдан бұрын облыс әкімі аппараты ұйымдастыру-инспекторлық бөлімінің жетекшісі қызметінде болған. Жолдыбай Базар. Дереккөз: «ҚазАқпарат». Фото: News.nur.kz.