Иә, Қызылордада қала салынады. Сырдарияның сол жағалауына. Бүгінде қала түсетін жердің асты-үсті толық зерттеуден өтті. 90 мыңға жуық халық сиятын жаңа шаһардың кескін-келбеті де ерекше болмақ. Оның архитектурасында шығыстың шырайлы келбеті де, қазақы нақыш та, заманауи технология да көрініс табады. Қаланы бастамас бұрын, Сырдарияның арғы беті мен бергі шетін жалғайтын көпір салу керек. Міне, бұрнағы күні сол көпірдің құрылысы басталды. Оған облыс әкімі Қырымбек Көшербаев және Сенат пен Мәжілістің бір топ депутаттары қатысты.
Облыстық жолаушылар көлігі және автомобиль жолдары басқармасының басшысы Марат Бәйімбетов тұсаукесер рәсімге арнайы келген меймандарды стенд арқылы көпір құрылысының жобасымен таныстырып, оның жұмысын елімізге белгілі «Мостотряд-25» ЖШС секілді тәжірибелі компания жүргізгелі отырғанын жеткізді. Жиналғандар алдында сөз алған өңір басшысы Қырымбек Көшербаев Қызылорда қаласының 2009 жылы бекіген бас жоспарына сәйкес 2300 гектарды құрайтын Сырдария өзенінің сол жағалауын жоспарлы игеру жұмыстары басталғалы отырғанын қуанышпен атап өтті.
– Бүгінгі шараны жай ғана көпірдің құрылысы басталды деп қабылдамау керек. Мұны ұлы өзеннің сол жағалауында жаңа қаланың құрылысы басталатын тарихи сәт деп санауымыз қажет. Бас жоспарға сәйкес бұл аумақта әлеуметтік-әкімшілік, өндірістік, мәдени, орта және шағын бизнес нысандарын салу қаралған. Бұған қоса, біз 15 мың адамды жұмыспен қамтитын боламыз, – деді.
Жалпы құны 5,9 миллиард теңге тұратын көпір құрылысына биыл республика бюджетінен 1 миллиард теңге қаралыпты. Өзге қаражат ел қазынасынан 2015 жылы бөлінеді. Ал, көпір құрылысы келер жылдың соңын ала аяқталады.
Көпір салу, құдық қазу сауапты істің қатарынан ғой. Ал дарияның екі шетін қосып, жаңа қаланың құрылысына жол ашатын бұл көпір үлкен сауапты істің бастамасы деп білеміз.
Ержан БАЙТІЛЕС,
«Егемен Қазақстан».
ҚЫЗЫЛОРДА.
