Ауқымды фестивальға Әзербайжан, Түрікменстан, Эстония, Швеция, Ұлыбритания, Өзбекстан, Түркия және Қазақстаннан 350 команда қатысқан. Отандастарымыз түрлі марапаттар мен жүлделі орындарға ие болды.
«Халықаралық бақылаушылар командалардың өнер көрсету деңгейін жоғары бағалады. Отандастарымыз Vex Robotics Competition саласы бойынша өткен бәсекеде басымдық танытып, негізгі 7 кубокті жеңіп алды. Жасөспірімдер санатында 1729X NEW EMPIRE командасы бірлескен жарыста 2-орынды, ал жеке сайыста 3-орынды иеленді. 1729K LSF жасөспірімдер тобы командалық жұмыста 3-орынға, жеке жарыста 2-орынға тұрақтады», деп жазды министр өзінің телеграм каналына.
Жарыстың шешуші кезеңдеріне қазақстандық 3 команда қатысып, барлығы да мәреге жеткен. Жоғары сынып оқушылары командалық және жеке санаттағы бәсекеде бірінші орынға ие болды.
«Балаларды әлемдік жарысқа дайындауға қолдау көрсеткен Satbayev University мен Халықаралық роботтехника академиясына алғысымды білдіремін», деді Б.Мусин.
