Ассамблея алаңындағы кездесулер

Сыртқы істер министрінің орынбасары Е.Ашықбаев бастаған қазақстандық делегация Парагвай астанасы – Асунсьонда өткен Америка мемлекеттері ұйымы 44-ші Бас ассамблеясының жұмысына қатысты. Америка мемлекеттері ұйы­мы – Америка континентінің 35 мем­лекетін біріктіретін ірі аймақ­тық ұйым. Қазақстан 1996 жылдан бері оның тұрақты бақылаушысы болып табылады. Іс-шараның ашылу күні қазақ­­стандық делегация басшысы Парагвай Сыртқы істер ми­­нистрінің орынбасары Ф.Гонса­леспен кездесті. Әңгі­ме­лесуші тараптар біздің елдері­міздің халықаралық күн тәрті­бінің, соның ішінде теңізге шығатын жолы жоқ мемлекеттер тобымен бірлескен жұмыс аясындағы бірқатар мәселелері бойынша ұстанымдарымыздың жақындығын растады. Келіс­сөздер қорытындысы бойынша Е.Ашықбаев пен Ф.Гонсалес Сая­си кеңестер орнату туралы ме­мо­рандумға қол қойып, біздің елдеріміз арасында виза­лық режімді жеңілдету бойын­ша келісім орнату жөнінде жұмыс­тарды бастауға уағдаласты. Америка мемлекеттері ұйы­мының Бас хатшысы Х.Ин­сульспен кездесуі барысын­да тараптар Қазақстан мен ұйым арасындағы өзара ықпал­дас­тықтың соңғы жылдары белсенді  сипатқа ие бола түскенін атап өтіп, әрі қарай ынтымақтастықты нығайту бағыттарын белгіледі. Сондай-ақ, Х.Инсульс жақын уа­­қытта Астанаға келуге қызы­ғушылық танытты. Америка мемлекеттері ұйы­мына мүше мемлекеттер сырт­қы істер министрлерінің алдын­да сөйлеген сөзінде қазақстан­дық делегация басшысы Қазақ­станның аймақтағы елдермен байланысының іс жүзінде нығаю болашағы жайында айтып берді. Жалпы, Бас ассамблея алаң­ында Е.Ашықбаев ұйымға мүше мем­лекеттер делегацияларының басшыларымен 25 кездесу өткізді. Атап айтқанда, Мексика, Доминикан Республикасы, Эк­ва­дор, Уругвай, Коста-Рика, Ба­гам, Ямайка, Ко­лумбия, Гре­нада, Гайана, Сент-Люсия, Сент-Винсент және Гренадин, Ника­рагуа, Суринам және т.б. мем­лекеттердің делегация басшыларымен кездесті. Саяси және сауда-экономикалық ынтымақтастықты кеңейту, Қа­зақстан кандидатурасын 2017-2018 жылдары БҰҰ Қауіпсіздік Кеңесіне тұрақты емес мүшелігіне тарту, сонымен қатар, Латын Америкасы мен Кариб бассейні елдерімен виза­лық режімді жеңіл­дету күн тәрті­бінің негізгі мәсе­лелеріне айналды.