«Егемен Қазақстан» газеті «Астана және мен» атты селфи-конкурс ұйымдастырмақ

АСТАНА. 10 маусым. Жыл сайын көңілге жылылық ұялата келетін мамыражай Астана күні жақындап келеді. Осы айтулы күнге орай «Егемен Қазақстан» газеті facebook әлеуметтік желісін қолданушылар үшін «Астана және мен» атты селфи-конкурс ұйымдастыруға шешім қабылдады. Бұл туралы egemen.kz тілшісі хабарлады. Селфи (фотоавтопортрет) – facebook әлеуметтік желісін қолданушылар арасында кеңінен тараған суретке түсіру әдістерінің бірі. Қазіргі таңда жастар жағы көбірек пайдаланатын суретке басудың бұл тәсілі интернетті, соның ішінде әлеуметтік желілерді тұрақты түрде қолданатындар арасында трендке айналып отыр десе де болады. Конкурсқа қатысушылардың ұсынатын суреттерінде Астананың бүгінгі келбеті, ондағы тарихи және халықтың көз қуанышына айналған, әлеуметтік маңызы зор орындар көрініс берулері керек. Сайысқа қатысушылардың арнайы тіркеуден өтуінің қажеті жоқ. Олар өздері түсірген елодамызға қатысты суреттерін 16-30 маусым күндері аралығында facebook-тегі photo.egemen.kz сайтына жіберіп тұрулары тиіс. Келіп түскен суреттердің әрқайсысы модерациядан өткеннен кейін photo.egemen.kz сайтына орналастырылады. Конкурстың соңында сайтқа орналастырылған жұмыстар іріктеліп, жеңімпаз бен жүлдегерлер есімдері анықталады. Оларға редакцияның арнайы сый-сиапттары тапсырылады. Жолдыбай Базар. Дереккөз: egemen.kz. Фото: egemen.kz.