Мемлекеттік қызметкерлерге 2015 жылдан бастап қазақ тілін білу міндеттеледі

АСТАНА. 10 маусым. 2015 жылдан бастап мемлекеттік қызметкерлерге қазақ тілін білу міндеттелмек. Орталық коммуникациялар қызметінде өткен брифингте Мәдениет министрi Арыстанбек Мұхамедиұлы осылай деп мәлімдеді. Министр 2011-2020 жылдарға арналған тілдерді дамыту бағдарламасы аясында жасалған жұмыстардың нақты көрсеткiштерi туралы әңгімеледі. Арыстанбек Мұхамедиұлы: «Есептi кезеңде мемлекеттiк тiлдi дамыту мен қолдануға бағытталған бiрқатар жұмыс атқарылды. Атап айтқанда, ҚАЗТЕСТ жүйесiн жетiлдiру бойынша мемлекеттiк тiлдi оқытуға арналған 5 деңгейден тұратын оқу-әдiстемелiк кешені әзiрлендi. Олар елiмiздiң барлық тiлдердi оқыту орталықтарына таратылды. Ендiгi кезекте мемлекеттiк қызметшiлерге қазақ тiлiн меңгерудi мiндеттеген дұрыс. Мұны 2015 жылдан бастап орталық және жергiлiктi атқарушы органдардың стратегиялық жоспарларына сатылы түрде ҚАЗТЕСТ жүйесiн енгiзу арқылы шешемiз», – деді. Нұрбай Елмұратов. Дереккөз: egemen.kz. Фото: mki.gov.kz.