Елімізде емделу шетелдерге қарағанда екі есе арзан

АСТАНА. 10 маусым. Бүгін Орталық коммуникациялар қызметінде өткен брифингте Денсаулық сақтау министрі Салидат Қайырбекова шетелдерге қарағанда елімізде емделу екі есе арзан екенін мәлімдеді. Бұл туралы egemen.kz тілшісі хабарлады. Салидат Қайырбекова: «Медицина саласына жоғары технологияларды енгізудің арқасында азаматтарымызды шетелге емделуге аз жібере бастадық. Айталық, бүйрек алмастыру шетелде 4,5 млн. теңге тұрса, Қазақстанда мұндай отаны жасаудың құны 2,1 млн. теңге тұрады. Яғни, ешқайда барудың қажеті жоқ. Бір адамды шетелге жіберіп емдеткеннен көрі, сол қаржыға Қазақстанда бірнеше адамды емдеуге болады», – деді. Министрдің айтуынша, ведомство жұмысына жаңа әдістер енгізіліп, нәтижесінде ағымдағы жылы бюджет қаражаты айтарлықтай үнемделіпті. Бұрындары салада көп қаржы стационарларға, қымбат емдеу шараларына жұмсалып келген екен. Енді күндізгі стационарлар қызметін кеңейтудің арқасында 76 млрд. теңге үнем болған. Нұрбай Елмұратов. Дереккөз: egemen.kz. Фото: news.mail.ru.