Студенттік жылдардан бастап-ақ киностудияға жақын болып, алдымен дубляж жасауға қатысып, одан кейін рөлдерде ойнаған актердің арманы асқақ, болашаққа деген ұмтылысы бөлек еді. Жоғары оқу орнын бітірер жылы «Қазақфильм» киностудиясында М.Бегалин қойған «Жерге қайтып оралу» атты фильмде екі басты рөлді ойнады. Олардың біріншісі – қойшы бала Ермек те, екіншісі – әртіс Асқар Әлиев. Кино түсіру аяқталғаннан кейін «Қазақфильм» студиясына актер болып жұмысқа тұрып, өнер жолын бастады. Актер өз естелігінде: «Түркістанның бүгіні мен ертеңін ойлағанда көңілімде бір түйткіл тұрды. Түркістанның рухын көтеру үшін ең әуелі сол жердің рухани игіліктерін жасауымыз қажет. Өзім ұзақ жылдар қызмет еткен өнер саласының биігінен қарасам, Түркістанға театр керек. Еліміз егемендік алды, Түркістан қайта түлейтін болады деп, жастайымнан бауыр басып қалған Алматыны, атақ-абыройына ие болған өнер ордасын тастап, туған жерге тартып кетуімнің басты себебі де сол болатын. Осында жинақталған тәжірибемді, азды-көпті өнерімді сонда алып барайын деп шештім. Түркістан қайта түлеп, іргесін кеңітіп жатқанда соның бір шегесі болып қалғым келді…» деп жазады. Ал оның театр өнеріне қосқан үлесі туралы замандастары да жақсы көзқарасқа ие. «...Еліміз аман болса, жеріміз бүтін болса, сахна өнерінің туы жығылмаса, онда Райымбектің романтикасы мен эпикасы, сезімі мен сыры, парасаты мен пайымы еш көмескі тартпастан, сахнаны кие тұтар талай ұрпақтың жолына нұр сәулесін түсіріп, таң жұлдызындай өнер аспанында әмәнда жарқырап тұратын болады», деп жазады академик Ақселеу Сейдімбек.
Біз бүгін Мұхтар Әуезовтің «Алуа» пьесасы және оны сахналаған Райымбек Сейтметов туралы сөйлемекпіз. 1983 жылы Ғ.Мүсірепов атындағы балалар мен жасөсіпірімдер театрына көркемдік жетекші болып барған Сейтметов құлдырап кеткен театр, қожыраған өнер ұжымына дұрыс басшылық керек екенін бірден аңдап, тың дүниелерді сахналап, көрерменнің көңілін табуды көздейді. Оның басшылығымен театр ұжымы екі-үш жылда қайта еңсе тіктеп, жаңа нәтижелерге қадам тастайды. Режиссер осы сәттерін «Жаңа дүние керек болғасын, М.Әуезовтің «Алуасын» сахналадым. «Алуа» спектаклі – менің шығармашылық өмірімнің бір белесі. Бұл М.Әуезовтің жазылып, бірақ 30 жыл бойы қойылмай тартпада жатқан шығармасы болатын. Бұл біздің театрымыз үшін де, ұлттық театр өнері үшін де үлкен оқиға болды», деп баяндайды. Еңбектің жемісі өтеліп, «Алуа» спектаклі көрерменнің көңілінен шығады. Спектакльдің жоғары деңгейде қойылғаны үшін режиссер Сейтметовке, Алуа рөлін сомдаған Гүлжамал Қазақбаеваға, Мәкіл Құланбаев пен Мұхтар Бақтыгереевтерге Қазақстан Республикасының Мемлекеттік сыйлығы беріледі. Былайша айтқанда, бір қойылымға қатысы бар төрт өнер қайраткері бірге марапаттың биік төрінен көрінеді. Сол үшін де біз кешігіп көрерменімен жолыққан «Алуа» спектаклін режиссер Райымбек Сейтметовтің бір тынысы дер едік.
