Меңдіқара ауданына қарасты Харьков ауылында Николай, Евгений және Виолетта есімді үшем дүниеге келді. Жергілікті тұрғындар мұндай қуанышты оқиғаның аудан тарихында осыдан 45 жыл бұрын ғана болғанын айтып отыр.
Үшемді дүниеге әкелген Алена Петрова осымен 7 баланың анасы атанды. Бұған дейін шиеттей бала-шағасымен екі бөлмелі тар үйде тұрып келген Петровтар отбасына жергілікті «Қарқын» агрофирмасының басшысы Еркін Бұқанов ауылдан еңсесі биік, кең баспана тарту етіп, үшемнің анасы ай сайын алып тұратын 100 мың теңге көлеміндегі қаржылай көмек тағайындады.
Аленаның толғағы қаңтардың сегізі күні уақтылы мерзімінен 4 апта ерте басталған. Шыдатпай бара жатқан соң, есі шыққан жолдасы әйелін көршісінің көлігімен дереу аудандық ауруханаға жеткізеді.
– Бейтаныс ер адам ауруханаға кірген бойда: «Қысылып жатыр. Көмектесіңдер!» деп айқай салды. Бәріміз аңтарылып қалдық. Мәселенің мәнісін түсінісімен, жедел жұмысқа кірістік. Таңғы сағат 6-да екі ұл және бір қыз бала дүние есігін ашты, – дейді Меңдіқара аудандық ауруханасының бас дәрігері Рудава Жакина.
Құрсақта 40 аптаның аяқталуын күтіп жатпай-ақ, мынау жарық дүниені көруге асыққан сәбилерді дәрігерлер бірден шала туғандарды ширататын арнайы шыныбет кювезге жатқызып, бір тәулік бойы бақылайды.
Жағдайлары тұрақты қалыпқа түскен сәбилер бір тәуліктен соң, санавиация арқылы Қостанай қаласындағы облыстық аурухананың перинаталдық орталығына жеткізіледі. Екі ұл бірден жалпы палатаға орналасқанымен, қыз бала екі күн бойы жансақтау бөлімінде жатқан.
– Мен Меңдіқарада дәрігерлердің бақылауында жаттым. Ал балаларымды Қостанайға алып кетті дегенді естігенде, біраз айқайға басып жұртты әбігерге салдым. Әйтеуір медбикелер сабырға шақырып, осылай болу керек екенін түсіндіріп бақты. Балаларымды қолыма алып, омырауыма қысқан соң ғана жаным тыныш тапты. Дәрігерлер мен акушерлерге, медбикелерге мың да бір рақмет, – дейді үшемнің анасы Алена.
Перинаталдық орталықтағы балалар бөлімінің меңгерушісі Игорь Бойконың айтуынша, үшемдер қазір қажетті терапия алып жатыр. Жағдайлары жақсы, тіпті, ақырындап салмақ та қоса бастаған.
– Нәрестелер, әсіресе қыз бала әлі де болса біраз ширай түсуі керек. Қазір жағдайлары қалыпты. Бірақ нәрестелер шала туғандықтан біраз уақыт бақылауда ұстап, ем жүргізіп, дәрігерлік күтім жасайтын боламыз. Үшемнің анасының денсаулығы да ақырындап жақсарып келеді, – дейді нәрестелерді емдеп жатқан дәрігер Әсет Өтегенов.
Қостанай облысы
