Қоғам • 29 Қаңтар, 2023

Кадетке қажетті тағылымдама

298 рет
көрсетілді
2 мин
оқу үшін

Щучье қаласында орналасқан Шоқан Уәлиханов атын­дағы Қорғаныс министрлігі әскери колледжінің кадеттері Құрлық әскерлерінің құрамалары мен бөлім­дерінде әскери тәжірибеден өтеді.

Кадетке қажетті тағылымдама

Оқу бағдарламасына сәй­кес 2-курстың 180-ге жуық кур­­санты мотоатқыштар, танк жә­не ар­тиллериялық бөлімше­лерде, сондай-ақ теңіз жаяу әс­­кері құрамасында бөлімше коман­дирі лауазымдарында әс­кери тағылымдамадан өтеді. Тәжірибе бөлімшелерді үйлес­тіру кезеңінде ұйымдастыры­лып отыр. Бұл өз кезегінде бола­шақ сержанттарға әскерлерді даяр­лау және жауынгерлік қолда­ну ерекшеліктерімен тікелей та­нысуға мүмкіндік береді.

Бір ай ішінде олар күнделікті және оқу-жауынгерлік қызмет үдерісінде жеке құрамды бас­қарудың негіздерін игеруі керек. Курсанттар тағылымдама барысында бағыныстыларды өз бетінше басқаруға, жауынгерлік даярлық, қару-жарақ пен әскери техниканы пайдалану бойынша сабақтар өткізуге тәжірибе алады. Сондай-ақ көшбасшылық және командирлік қабілеттерін жетілдіреді.

– Бұл мен үшін де, курстас­тарым үшін де оқу орнында ал­ған теориялық білімімізді тексеру­ге және тәжірибеде қол­дануға тамаша мүмкіндік. Мұнда ­казар­малар мен полигондарда жеке құрамды бас­қара оты­рып, біз сержанттар жұмысының қаншалық­ты маңызды екенін түсінеміз. Қа­зірдің өзінде  сарбаздар­ға үлгі бо­луға тырысамыз, – деді 4-меха­никаландырылған құра­мада тағылымдамадан өтіп жат­қан кадет Расул Бердалиев.

Ш.Уәли­ханов атындағы Қор­ғаныс ми­нис­трлігінің әскери колледжі кәсіби сержанттар мектебі болып саналады. Бұл жерде Құр­лық әскерлерінің бө­лімшелері үшін кіші коман­дирлерді даяр­лау бойынша бі­лім беру бағ­дарламаларын іс­ке асырады. Жас­өспірімдер ­оқу орнына орта білім алғаннан ­ке­йін (орта мек­тептің 11-сыныбы) түсе алады.

Іріктеу медициналық куә­­ландыру, кәсіптік-психо­ло­гия­­лық тестілеу және дене­шы­нықтыру даярлығы бойынша нормативтерді тапсыру жолымен аттестаттың орташа балы ескеріле отырып жүргізіледі. Әскери колледжді бітіргеннен ке­йін түлектер «сержант» әскери атағын, «әскери істегі кіші буын менеджменті» мамандығын, сыныптық біліктілігін алады және келісімшарт бойынша әскери қызмет өткеру үшін Қарулы Күштерге жіберіледі.