Экономика • 30 Қаңтар, 2023

1 700 жолаушының өтелген шығыны

217 рет
көрсетілді
4 мин
оқу үшін

Елімізде пойыздардың кешігуі жолаушылар арасында дүрбелең тудырып, көпшілікті толғандырған басты мәселелер қатарына шықты. Жаңа жыл алдындағы 3-4 сағатқа кешігу қазір айналайын болып қалған. 2023 жыл бастала салысымен бірқатар бағыт бойынша пойыздар Астанаға 10-12 сағатқа кешігіп келіп жатты. Жекелеген адамдардың куәлігі мен әлеуметтік желідегі жазбалардан аңғарғанымыз – өзге өңірлердегі ахуал да оңып тұрған жоқ.

1 700 жолаушының өтелген шығыны

Осылайша, вокзал мен вагон­дардағы тиісті инфрақұрылым, жолсеріктер мен басқа да қызмет көрсетуші персоналдардың этикасы, негізсіз өскен билет бағасы секілді аса өткір проблемалар екінші планға еріксіз ысырылды. «Қазақстан темір жолы» ұлттық компаниясы біздің сұрағымызға берген жауабында кешігуге негізгі үш себепті атап көрсетіпті.

Ұлттық компанияның хабарлауынша, Қазақстан теміржол желісінде 139 жолаушылар (оның ішінде 15 халықаралық) және қала маңына қатынайтын пойыздар жүреді. «Қозғалыс қауіпсіздігін қамтамасыз ету мақсатында жүк вагондарының рельстен шығып кетуіне, ауа райының қолай­сыздығына, сондай-ақ жос­пар­лы теміржол желісінің жөн­деу жұмыстарына байланыс­ты темір­жол учаскелерінің өткізу қабі­леті төмендетілді. Осы­ған байланыс­ты жолаушылар пойыздарының жол жүру жиілігінде қозғалыс кестесі өзгерді. 2022 жылдың 17 қарашасынан қазіргі күнге дейін 1 сағаттан астам уақыттан кешігіп келген пойыздардың саны тіркелді. Дей тұрғанмен, пойыздардың бар­лы­ғы ұзақ уақытқа кешігіп келіп жатқан жоқ», делінген жауапта.

Бұл ретте пойыздардың қоз­ғалыс кестесіне сай уақтылы жүруі үшін қысқартылған және тоқтатылған пойыздардың жолау­шы­ларын тасымалдауға стандартты вагондардан құрыл­ған 18 бір­реттік пойыздар жолға шыққан.

«Сондай-ақ «Patentes Talgo S.L.» ЖШС-мен бірлесіп, қалып­тастыру пунктінде пойыздарға тех­никалық қызмет көрсету уақы­ты қысқартылды. Уақытша қысқар­тылған техникалық дайындық және біржолғы пойыздардың жол жүруін жарақтандыру жұмысымен қамтамасыз етілуде. Компания өкілдерімен мобильді топтар ұйым­дастырылып, теміржол вок­зал­дарында жолаушыларға түсіндіру, жолаушыларды вагондарға отырғызу жұмыстары жүргізіліп жатыр. Жол жүру құжаттарын және олардың айырмасын қай­тару жұмыстары жүргізілуде. Бұқаралық ақпарат құралдары, веб-сайттар, әлеуметтік желілер арқылы теміржолдағы өзгеріс туралы жаңалықтар таратылып жатыр. Кешіктірілген пойыздардың жоспарлы жөнелтілуі үшін барлық қажетті шаралар қабылдануда», делінген хабарламада.

Жылжымалы құрам мен темір­жол инфрақұрылымының жыл­дан-жылға тозып бара жат­­қа­нын ұлт­тық компания мойындап отыр. Өздерінің мәлімдеуінше, жыл са­йын орта есеппен 450-500 км теміржолға күрделі жөндеу, сон­­дай-ақ ағымдағы ұстап тұру жұмыс­тары жүргізіледі екен.

«Қозғалыс қауіпсіздігін қам­тамасыз ету үшін учаскелерде қозғалыс жылдамдығына шек­теу­лер енгізілсе, бұл пойыз­дар­дың кешігуіне әкеледі. Ком­пания жол бойында пойыздар кідірісінің санын азайту бойын­ша ұйымдастырушылық және технологиялық шаралар қабыл­дауда. Жолаушылар пойызы вагондарының техникалық жай-күйі нормативтік және өзге де техникалық талаптарға сай», деп хабарлады ұлттық компания.

Магистральдық теміржол желісінде 45 жол дистанциясы қызмет көрсетеді екен. Әр жол дистанциясының қызмет көр­сету шекарасы, жолдың күн­делік­ті тексерілуін, ағым­дағы жұмыс­тар­дың орындалуын қам­тамасыз ету есебімен белгіленген. Оған қо­са, бас жолдарды кесте бойын­ша айына екі рет жылжымалы диаг­ностикалық кешендермен жолдың геометриялық өлшемдері мен рельс ақауларын тексеріп отырады.

Компания дерегі бойынша, 2022 жылы жолаушылар пойыздарының кешіктіріліп келгені үшін 3 пайыз мөлшеріндегі өтемақы 1 700-ден астам жолау­шыға төленген.