«1 ақпаннан бері онлайн-өтінішпен пунктке 16 азамат жүгінді, оның ішінде Ресей Федерациясында тіркелген 2 автокөліктің иелері көліктерін заңдастырып, нөмірлерін алды. Порталға Екібастұз өңірінің барлығы 247 тұрғыны жүгінген. Онлайн-өтінімдер бойынша криминологтар заңдастыруға өтініш білдірген иелерінің 10 көлігін тексерді», деді Екібастұз қалалық ПД бастығының бірінші орынбасары Төлеген Құдайбергенов.
Бұған дейін азаматтарға ыңғайлы болу үшін қалалық халыққа қызмет көрсету орталығында қосымша заңдастыру пункті ашылған еді. Заңдастыру деректерін тексеруге өтінішті e-gov.kz электронды үкімет порталы немесе екінші деңгейлі банктердің өтініштері арқылы жіберуге болады.
«Дербес компьютерге қолы жетпеген көлік иелері Екібастұз қаласының халыққа қызмет көрсету орталығының өзіне-өзі қызмет көрсету секторына жүгіне алады. Өтінішті Қазақстан Республикасы Ішкі істер министрлігі қарайды. Нәтижесі арнайы базаға тіркеліп, көлік иесінің телефонына 1414 нөмірінен SMS жіберіледі. Шешім хабарламада жазылады», деп толықтырды полиция департаментінен.
Жүргізушіде жеке куәлік, көлік құралының төлқұжаты немесе тіркеу куәлігі, көлік құралына меншік құқығын растайтын құжат болуы керек. Өтініште көліктің тіркеу деректерін дұрыс толтыру қажет дейді тәртіп сақшылары.
