Ведомствоның хабарлауынша, Мемлекет басшысы Қасым-Жомарт Тоқаевтың тапсырмасы аясында жекелеген санаттарға жататын азаматтардың мәселесін жеделдетіп шешу үшін қазір елімізде жеке тұрғын үй қорындағы баспананың жалға алу ақысын субсидиялау тетігі іске асырылып жатыр.
«Биыл осы мақсатқа 50 млрд теңге бөлінеді. Бұл 70 мыңға жуық адамды қамтуға мүмкіндік беріп, олардың баспананы жалға алудағы төлемінің 50 пайызын өтеуге септеседі», делінген хабарламада.
Аталған бағдарламаға қатысу үшін Otbasybank.kz платформасына өтініш жіберу қажет.
«Субсидиялауға өтініштер электронды цифрлы қолтаңба (ЭЦҚ) арқылы қабылданады. Сонымен қатар жалға берілетін тұрғын үйді азаматтар өздері іздеп, таңдауы тиіс. «Отбасы банк» тұрғын үйді жалға алу бойынша субсидияларды жалдау шартының қолданылу мерзімі мен төлемдердің кестесіне сәйкес ай сайын төлейді», делінген министрлік хабарламасында.
Жалға алу төлемдері бойынша мемлекеттік субсидияны алуға келесі санаттағы адамдар үміткер бола алады:
- I және II топтағы мүгедектер;
- мүмкіндігі шектеулі балаларды тәрбиелеп отырған отбасылар;
- жетім балалар;
- көп балалы отбасылар.
Бұл ретте, үміткер отбасылардың кейінгі 6 айдағы орта айлық жиынтық табысының мөлшері жанұяның әр мүшесіне шаққанда ең төменгі күнкөріс деңгейінен аспауға тиіс. Отбасы банкі субсидия алушылардың сәйкестігіне мониторинг жүргізіп, ай сайын төлем тәртібін қадағалайды. Ал жергілікті әкімдіктер кемінде тоқсанына бір рет жалға берілетін тұрғын үйді тексеріп отырады.
«Бұл орайда жақын туыстарынан, бұрын некеде тұрған жұбайларынан және ерлі-зайыптылардың туыстарынан тұрғын үйді жалға алуға, сондай-ақ аталған баспананы қайта жалдауға өткізуге тыйым салынады», деп ескертеді ведомство өкілдері.
