Ташкентте мұндай суық ауа райы жарты ғасырдан бері болған жоқ, ал Түркіменстанның кейбір аймақтарында ең төменгі температураның жаңа рекорды тіркелген.
Биыл Қазақстан, Қырғызстан және Өзбекстанның кейбір аймақтарында құбырлар қатып, жарылып, жүздеген үйлер мен мыңдаған адамдар жылу мен сусыз қалды.
Қолайсыз ауа-райы кезінде туындаған мәселелер Орта Азияның энергетика секторының әлсіз екенін көрсетті. Талай жылдан бері жөндеу көрмеген ЖЭС-тер ауыр жүктемені көтере алмайды.
Статистикалық мәліметке сүйенсек, Орта Азия елдері энергетикалық құрылымы өте баяу дамитын немесе мүлдем дамымаған елдердің қатарында тұр.
Премьер-министр Әлихан Смайылов Қазақстан бойынша жұмыс істеп тұрған 37 ЖЭО-ның 19-ы қызыл аймақта екенін айтқан. ЖЭС-тердің жарылысынан кейін басшылары ауысып, жаңа инвесторларды тарту қолға алынған. Расында, бұл кезек күттірмейтін маңызды мәселе.
«Бұл барлық елдер үшін қиын қыс болды және инвестициялардың жетіспеушілігінен туындаған энергетикалық мәселелерді енді елемеуге болмайды. Қарапайым тілмен айтқанда, энергетика секторы кеңес одағынан қалған жүйемен келе жатыр», деді Visor Kazakhstan инвестициялық компаниясының экономисі әрі серіктесі Алмас Чукин.
