Құқық • 20 Ақпан, 2023

Сергек сақшының жұмысы да тиянақты

295 рет
көрсетілді
2 мин
оқу үшін

Жуырда Петропавл қалалық поли­ция басқармасы бастығы­ның бірінші орынбасары, по­лиция подполковнигі Әлібек Ғаб­дуллин 2022 жылғы жедел-қыз­меттік жұмыстың қоры­тын­дысы бойынша халық алдында есептік кездесу өткізді.

Сергек сақшының жұмысы да тиянақты

Полиция басқармасы – облыстағы ең ірі ішкі істер бөлінісі. Сол себепті құқық бұзушылық, қылмыс бойынша да көп оқиға осы аумақта тіркеледі. Облыс орталығында жол апаты және қоғамдық құқық бұзушылықтың саны да жоғары. Ресеймен екі ортадағы шекарада орналасуы да қаладағы қылмыс санының өсуіне өзіндік ықпал етеді. Өйткені көрші елде қылмыс жасап, Петропавлда бой тасалайтындар немесе керісінше қалада заңсыздыққа барып, шекара асып кететіндер көп. Өткен жылы ашылмай қалған 60 қылмыстың ақ-қарасы анықталып, 41 қылмыскер ұсталыпты. Хабар-ошарсыз кеткен 16 азаматтың жүрген жері анықталған. Жыл бойы 199 жол-көлік оқиғасы тіркеліп, соның салдарынан 5 адам қаза тауып, 244 жолаушы түрлі дәрежедегі жарақат алған.

Петропавлда еліміздің басқа қала­ла­рымен салыстырғанда алкоголь­дік ішімдік ішіп, қоғамдық орындарда мас күйінде жүретіндер саны көп кез­де­седі. Тек былтыр ғана сондай 5200-ден астам адам құқық бұзушы ре­тінде жауапкершілікке тартылған. Сондай-ақ құрамында спирті бар 17 мың литрден астам алкоголь заңсыз ай­налымнан алынды.

Әлібек Ғабдуллин жеке құрам қылмыс пен құқық бұзушылықтардың алдын алу бойынша да барлық қажетті шараларды қабылдап жатқанын атап өтті. «Бірақ электрондық төлемдер және онлайн-дүкендер арқылы, жал­пы ақпараттық технологияларды пай­да­лана отырып жасалатын алаяқтық түрлерін толық әшкерелеуге шамамыз келмей отыр. Бір жыл ішінде 818 алаяқ­тық дерегі тіркелді. Оның ішінде 657 факті интернет арқылы жасалған», деді ол.

Ал профилактикалық жұмыстар күн сайын барлық жеке құрамның қатысуымен жүргізіледі. Осындай жұмыстың нәтижесінде өткен жылы 600-ден астам азамат интернет алаяқ­тар­мен сөйлесуден бас тартып, қыл­мыс­тың алдын алған. Кездесуге келгендер отбасылық жанжалқойларға қатысты қабылданатын шаралар, жолаушылар тасымалын ұйымдастыру, ішкі істер органдарына жұмысқа орналасуға қатысты мәселелерді ортаға салды. Солардың ішінде полицияның құзыретіне кіретін барлық сұраққа жауап берілді.

 

ПЕТРОПАВЛ