Ерлігімен елге танылған Жақсы ауданына қарасты Алғабас ауылының тумасы – Кеңес Одағының Батыры атағына ұсынылған Қожамсейіт Шаяхметұлы атамыздың майдан даласында көрсеткен ерліктері айтуға тұрарлық. Атамыз 1923 жылы 23 ақпан күні Алғабас ауылында дүниеге келген. Жастайынан жетім қалып, балғын балалық шағын қиындықпен өткізген. 1942 жылдың сәуір айында майданға аттанып Сталинград, Дон, Оңтүстік-Батыс және 1-Беларусь майданында Украина, Молдова және Польша жерлерін жаудан азат етуге қатысқан. Соғыстың алғашқы күндері-ақ жауға деген өшпенділігін айқын көрсетіп, асқан жауапкершілікпен командирдің бұйрығын мүлтіксіз орындап батылдығымен, ерлігімен ерекше көзге түседі. 1942 жылы «Ерлігі үшін» медалімен, 1943 және 1945 жылдары екі мәрте «Қызыл Жұлдыз» және «Жауынгерлік Қызыл Ту», сондай-ақ қаһармандығы үшін бірінші дәрежелі «Ұлы Отан соғысы» ордендерімен марапатталған.
Алапат соғыста Қожамсейіт атамыз асқан ерліктің үлгісін көрсетеді. Шешуші айқастан кейін көзсіз ерлігі еленіп басшылықтың шешімімен Кеңес Одағының Батыры атағына ұсынылады. Ашық ақпарат көзіндегі дерекке жүгінсек: «Шпрее өзенінен өту барысында 1945 жылдың 23 сәуір күні гвардия аға сержанты Қожамсейіт Шаяхметов айрықша ерлік, тапқырлық пен ептілік танытты. Өз өмірін аямай, жауға оқты қарша боратып, «Отан үшін!», «Сталин үшін!» деп ұрандатып, Шпрее өзенінің сол жағалауына жаяу әскерді өткізуге жәрдемдесіп, бірнеше жаудың көзін жойып, техникасын қиратып, плацдармды кеңейтіп, аумақты жаудан тазартты. Берлин қаласының маңындағы ұрыс кезінде Шпрее өзені, Ландвер каналы және қаланың көше ұрыстарында гвардия аға сержанты Қожамсейіт Шаяхметов бастаған жауынгерлер 3 неміс танкісін, 2 өздігінен жүретін техникасын, 4 бронетранспортерін, әскери жүк тиелген 10 автокөлікті, 5 ПТО құралдарын және 170-ке жуық фашистің көзін жойды. Жеке өзі 21 гитлершілді, оның ішінде 2 капитанды тұтқынға алды. Қожамсейіт Шаяхметов Кеңес Одағының Батыры атағына лайық. 64-гвардиялық ОИТПД ГВ гвардия майоры А.Сафонов. 1945 жылдың 6 мамыры» деп жазылған. Бірақ, өкінішке қарай, жеңіс күнін жақындатуға осыншама ерлік көрсетіп, жан аямай арпалысқан батыр атамызға Кеңес Одағының Батыры алтын жұлдызы «бұйырмаған».
Сыртқы істер министрлігі арқылы Мәскеу қаласындағы Қазақстан елшілігінің қолдауымен Ресей мемлекеттік архивінен және Ресей Қорғаныс министрлігіне сұрау салған хатқа жауап алдық. Онда жоғарыдағы ерлік тайға таңба басқандай көрсетілген.
Қазақ елі егемендік алған соң, заман талабына сай өз елінің батырлары мен ардагерлерінің абыройын асқақтату мақсатында тыңғылықты істер атқарып жатыр. Екінші дүниежүзілік соғыс туралы айтылмай кеткен ақиқаттар ақпарат құралдарында жиі жазылып, айтылып жүр. Ерліктері елеусіз, еленбей қалған қаншама боздақтардың аты-жөндерін паш етіп, келешек ұрпаққа аманат ретінде жариялау – біздің парызымыз. Алғабас ауылы тұрғындары және Қожамсейіт атамыздың ұрпақтары атамызды батыр ретінде мақтан тұтамыз. Тәуелсіздік алған одақтас мемлекеттер өз елінің Ата Заңына сүйеніп, өз елінің батыры атағын беріп жатқанынан бәріміз де хабардармыз. Қожамсейіт Шаяхметұлы атамыздың 100 жылдық мерейтойы құрметіне батыр рухына тағзым ретінде «Халық Қаһарманы» атағына ұсынуды ел болып қолдайық.
Талғат ҚҰРМАНҰЛЫ,
Астана қаласының тұрғыны