![Депутат болу оңай екен деп ойламау керек – Кәрімбек Құрманәлиев](/media/2023/03/13/crop-25_12_659x815_whatsapp-image-2023-02-20-at-16.03.20.jpeg)
- «Бұл ән – бұрынғы әннен өзгерек» дегендей биылғы сайлаудың жөні бөлек. Былтыр бүкілхалықтық референдумда Мемлекет басшысы ұсынған конституциялық реформаларды қолдап, дауыс бердік. Сол конституциялық реформаларға сәйкес жаңадан өткізіліп отырған сайлаудың өзіндік ерекшеліктері бар. Біріншіден, бұл тек қана партиялық тізіммен ғана емес, можаритарлық жүйемен жүзеге асқалы жатыр. Яғни, бір мандаттық округтан өзіңді-өзің ұсыну арқылы депутат бола алатын мүмкіндік туындап отыр. Осы ретте халық пен биліктің арасында алтын көпір болып жүрген, елдің сөзін сөйлеп жүрген, Үкіметке әңгіме айта алатын тұлғалар депутат бола алады. Бұл жаңашылдықты демократиялық өзгерістеріміздің, жаңа Қазақстанның, Әділетті Қазақстанның жарқын жолына бастау деп бағалауымыз керек.
Депутат болып сайлану бар да оны ары қарай жауапкершілікпен атқару бар. Жаңа заңнамаларға сәйкес депутат болып сайланғанның өзінде халықтың сөзін айтпай, елдік сөз сөйлемей, ірі істерге ой-пікіріңізбен араласа алмасаңыз, жылы орныңыздан айырылып қалуыңыз әбден мүмкін. Өйткені кандидатты таңдаған сайлаушылар үміткерінің істеп жатқан жұмысына қанағаттанбаса, сайланған адамды кері қайтарып алу мүмкіншілігі бар. Сол себептен депутат болу оңай екен деп ойламау керек. Нағыз ұлтқа қызмет ететін, жауапкершіліктің жоғары деңгейін көрсететін тұғырлы тұлғалар ғана депутат атануы керек. Сол себептен мен 19-наурызда өтетін сайлауға барлық дауыс берушілерді белсенді қатысуға шақырамын. Лайықты кандидаттарға дауыс беріп, әділетті Қазақстан мен жаңа Қазақстанның жарқын болашағы үшін үніңізді қосыңыз, белсенді болыңыз, дауыс беріңіз!, - деді Кәрімбек Құрманәлиев.