Жасампаздық жолында жеті жылға Президентімізді сайлап алдық. Биыл қаңтарда заң шығару қызметін жүзеге асыратын республиканың өкілді органы – Парламент Сенатының депутаттарын сайлау өтті. Енді алда Парламент Мәжілісі және жергілікті мәслихаттар депутаттарын кезектен тыс сайлау науқаны өтеді. Бұл сайлаулардың ерекшелігі – референдум нәтижесі бойынша қабылданған түзетулерге сәйкес олардың аралас сипатқа ие болуы. Азаматтар кандидаттарға партиялық тізім бойынша таңдау жолымен ғана емес, сонымен қатар өзін-өзі ұсынған кандидаттарға да дауыс бере алады. Тағы бір жаңашылдық – нақты бір сайланушының жұмысына көңілі толмаса азаматтар оның кандидатурасын қайтарып алуға құқылы. Жалпы, сайлау науқаны еліміздегі бүкіл саяси үдерістің дамуының оң трендіне ие. Егер біз қоғамда өзгерістер болғанын қаласақ, егер мемлекеттілігімізді нығайта түсуді көздесек, онда еліміздегі өте маңызды мемлекеттік және саяси акциялар – Мәжіліс пен мәслихаттар сайлауына белсенді қатысуымыз керек.
Саяси партиялар мен қоғамдық ұйымдардың, халықтың атқарар рөлі үлкен. Ел болашағы үшін маңызды сәтте халық сайлау үдерісіне белсене қатысып, ел таңдауын бірге жасауы қажет. Еліміздің болашағына бейжай қарамайтын әр азамат сайлау учаскесінен табылады деген сенімдемін.
Рымтай ШӨКЕЕВ,
Павлодар облыстық ардагерлер
кеңесінің төрағасы
