Еуразиялық экономикалық одақтың пайда болуының тарихи мәні зор

АСТАНА. 26 маусым. Еуразиялық интеграция бойынша әріптес мемлекеттердің экспорты 63 пайызға өсті. Қазақстан, Беларусь және Ресей дипломатиялық миссиялары басшыларының бірлескен брифингінде еліміздің Өзбекстандағы төтенше және өкілетті елшісі Бөрібай Жексембин осылай деді. Бұл туралы «ҚазАқпарат» хабарлады. Брифингте Бөрібай Жексембин Еуразия экономикалық одақтың пайда болуы тарихи тұрғыда маңызды екенін айта келе: «Қазіргі таңда 170 млн. адамы бар, жалпы өнімінің көлемі 2 трлн. доллардан асып жығылатын бірыңғай нарық құрылды. Кеден одағы мен Бірыңғай экономикалық кеңістік барынша қарқынды дамушы әлемдік экономикалық жобалардың біріне айналды. Тек соңғы 5 жылда ғана біздің елдеріміз арасындағы тауар айналымы 88 пайызға өсіп, 24 млрд. АҚШ долларына жетті. Еуразиялық интеграция бойынша серіктес мемлекеттердің экспорты 63 пайызға өсті және 10 млрд. долларды құрады», – деді. Естеріңізге сала кетейік, 2014 жылдың 29 мамырында Астанада Қазақстан, Беларусь және Ресей Президенттері Еуразиялық экономикалық одақ құру туралы шартқа қол қойды. Жолдыбай Базар. Дереккөз: «ҚазАқпарат». Фото: «ҚазАқпарат».