Бұл сервис Цифрлық даму, инновациялар және аэроғарыш өнеркәсібі министрлігі, Ұлттық банк, «Ұлттық ақпараттық технологиялар» АҚ және «Мемлекеттік несие бюросы» АҚ үйлесімді жұмысының нәтижесінде жүзеге асырылды.
Сақтандыру полисі – көлік құралдары иелерінің азаматтық-құқықтық жауапкершілігін сақтандырудың міндетті түрі бойынша сақтандырушы мен сақтанушы арасындағы шарттық қатынастардың дерегін растайтын құжат.
– Басқа цифрлық құжаттармен ұқсастығы бойынша «сақтандыру полисі» қағаз құжатпен қатар заңды күшіне ие және сақтандыру компаниясы, сақтандыру полисінің мерзімі және тағы да басқа ақпаратты қамтиды. Аталған цифрлық құжаттағы барлық мәлімет «Мемлекеттік несие бюросы» АҚ ақпараттық жүйесімен интеграциялық өзара іс-қимыл арқылы көрсетіледі. Министрлік халыққа ыңғайлы болу үшін құжаттарды цифрландыру жұмысын жалғастырады, – деді министр Бағдат Мусин.
Аталған цифрлық құжат азаматтарға өз құжатын мобильді қосымша арқылы электрондық форматта көруге, сондай-ақ оның дұрыстығын тексеруге мүмкіндік береді.
Сақтандыру полисінің болуы немесе болмауы туралы ақпарат міндетті сақтандыру туралы заңның талаптарын, атап айтқанда, көлік құралдары иелерінің азаматтық-құқықтық жауапкершілігін орындау үшін, сондай-ақ азаматты сақтандыру шартының аяқталу мерзімін бақылау және өзге де мақсаттар үшін пайдалануға қажет.
Мемлекеттік несие бюросының мәліметінше, 2022 жылдың қорытындысы бойынша 6 млн-нан астам сақтандыру полисі берілген.
