![Бесінші рет үздік атанды](/media/2023/03/29/nish-quramasy-1.jpeg)
Жас математиктер, информатиктер, физиктер, химиктер және географтар жеке және командалық есепте жеткен жетістіктерімен NIS-тің жоғары стандарттарын қайта растады. Зияткерлік мектептердің медальдар қоржыны 60-тан астам түрлі дәрежедегі наградамен толықты. Олардың үштен бірі – алтын. NIS өкілдерінің барлығы дерлік құрмет тұғырынан көрінді.
Еліміздің үздік физигі атағын Алматыдағы физика-математика бағытындағы Зияткерлік мектептің оқушысы Ерсұлтан Пітебай алды. Жақында ғана оны көпшілік беделді жоғары оқу орындарының әлемдік рейтингінде көш бастап тұрған Массачусетс технологиялық институтына шақырту алып, грантын иеленуімен құттықтаған болатын.
Олимпиаданың күміс жүлдегері, 2023 жылғы түлектердің жұлдызды командасының мүшесі Альмира Нұрланова да Массачусетс технологиялық институтының грантын иеленді.
Өткен жылы география пәнінен халықаралық IGeO олимпиадасының жеңісті марафонын жалғастырған Санжар Хамитов Ақтөбе қаласындағы NIS-ті кезекті алтын медалімен қуантты.
Бірінші орын иеленген Зияткерлік мектептер өкілдерінің қатарында семейлік Мұхаммадириф Сахмолдин, NIS халықаралық бакалавриаттан Аида Давлетова, елордадағы физика-математика бағытындағы NIS оқушысы Санжар Бисенәлі бар. Олар халықаралық беделді олимпиадаларда ел абыройын асқақтатып келеді.
Ең көп медалді Алматыдағы физика-математика бағытындағы Зияткерлік мектеп мен Павлодардағы NIS оқушылары еншілеген.
Зияткерлік мектептердің республикалық олимпиададағы жаңа жарқын жеңісі NIS-тің академиялық жетістіктерінің жалғасына айналды.