Батыс Қазақстан облысы Қаратөбе ауданы Қаратөбе ауылында дүниеге келген Ерасыл бала күнінен әскери адам болуды армандап өсті. Болашақ теңізші жетіге толған жылы Мағзомовтар отбасы Ақтөбе облысының Қандыағаш қаласына қоныс аударды. Ерасыл осында 1-сыныпқа барды. Әкесі Зейін Жөкенұлы «Комунальщик» мемлекеттік қазыналық кәсіпорнында жылу жүйелері учаскесі қызметінің бастығы болып еңбек етеді. Анасы Райхан Базарқызы – бала оқытқан ұстаз. Ағылшын тілінің маманы. Үлгілі отбасында тәрбие алған, оқу-білімге ынталы бала мектептегі ақылды әрі тәртіпті оқушылардың бірі болды. Талапты шәкіртінің ұқыптылығын ұстаздары да әрдайым мақтан тұтатын. Отбасының үлкені болған соң өзінен кейінгі қос қарындасы Арна мен Адаға қарайласа жүруді ұмытқан жоқ. 2007 жылы 9-сыныпты бітірген Ерасыл Түркия Республикасының Ыстанбұл қаласындағы Әскери-теңіз лицейіне оқуға түсті. Сырт елде жүріп, туған елі мен ата-анасының өзіне артқан сенімін әрқашан ақтап жүруді қалайтын. Жыл сайын сабақтары біткен соң бір айлық алғашқы әскери дайындық курстарына қатысып, дағдысын дамытты. Түрік, ағылшын тілдерін еркін меңгерді. Бүгінде Әскери-теңіз күштері бас қолбасшысы басқармасында қызмет ететін капитан-лейтенант Есен Аубакиров екеуі әскери лицейде бірге білім алды. Әрі аталған оқу орнын қазақстандықтардың ішінен алғаш бітірген түлектердің бірі.
Әскери өмірге бала күнінен құмартып өскен талапты жас 2012 жылы лицейді тәмамдап, Түркияның Әскери-теңіз академиясына оқуға қабылданды. Академияда білім алған жылдары Мәрмәр, Жерорта және Қара теңіздердегі үлкен жорықтарға қатысып, ширығып шыңдалды. Бауырлас елдің әскери оқу орындарында 9 жыл білім алған Ерасылдың Отан алдындағы қызметі Әскери-теңіз күштерінің «Қазақстан» зымыран-артиллериялық кемесі штурмандық жауынгерлік бөлімінің топ командирі лауазымынан басталды.
Былтырғы қазан айында кеме командирі болып тағайындалғанға дейін «Сарыарқа» зымыран-артиллериялық кемесі штурмандық жауынгерлік бөлімінің командирі және «Маңғыстау» зымыран-артиллериялық кемесі командирінің көмекшісі лауазымдарын абыроймен атқарды. 2021-2022 жылдары Ресей Федерациясы Санкт-Петербург қаласындағы Кеңес Одағы Флоты Адмиралы Н.Г.Кузнецов атындағы Әскери-теңіз академиясы қосымша кәсіптік білім беру әскери институтында бір жыл білім алды. Аталған оқу орнын қызыл дипломмен тәмамдады.
Әртекті кемелер дивизионында қызмет атқару кезінде капитан-лейтенант Ерасыл Мағзомовтың ұжымы Халықаралық армия ойындары аясындағы «Теңіз кубогі» байқауына 3 рет қатысып, жүлделі орындарға ие болды. Соның ішінде 2021 жылы «Маңғыстау» зымыран-артиллериялық кемесі Иранда өткен «Теңіз кубогінде» жоғары даярлық деңгейі мен кәсіби шеберліктерін көрсетті. 6 эпизодтан тұратын бұл байқаулардың құрамында әуе нысанасын атып түсіру, теңіз нысанасын жою, жүзген мина макетін ату, оқу-жаттығу кешенінде төзімділік үшін күрес, құтқару даярлығы және теңіз машығы бар.
Төзімділік үшін күрес құрлықтағы оқу-жаттығу кешенінде жүзеге асады. Теңізшілер кеме ішкі бөлімінің макетінде, яғни кемелік су және өрт өткізбейтін құралдармен жабдықталған бөлмеде корпуста пайда болған тесіктен кірген суды тоқтатуға және тесікті бітеуге машықтанады. Құтқару даярлығы бойынша эпизодта гидрокостюм киген 5 теңізші шартты палубадан секіріп 25 метр қашықтықтағы үрлемелі құтқару плотына жүзіп барады және оған мініп, плот қалақшаларының көмегімен шартты палубаға қайтып келеді.
Теңіз машығында кемені зәкір мен бөшкеге қою пысықталады. Мұнда кеменің алдыңғы бөлігінен зәкір тасталып, артқы бөлігі арқанмен бөшкеге байланады. Байқау шарты бойынша алды-артынан байланған кеме 10 минут бойы бір курсты ұстап тұру керек. Бұл сынақтардың бәрінде бір жағадан бас, бір жеңнен қол шығара білген маңғыстаулықтардың мерейі үстем болған.
«Әскери өмірді, оның ішінде теңізші мамандығын таңдағаныма еш өкінбеймін, – дейді капитан-лейтенант Е.Мағзомов. – Оқуға түскенде кеме командирі болуды армандамайтын теңізші жоқ. Бүгінде ол арманым орындалды десем болады. Сонымен бірге Қазақстан Республикасы Әскери-теңіз күштерінің жауапкершілік аймақтарында жауынгерлік тапсырмаларды орындайтын «Маңғыстау» зымыран-артиллериялық кемесін тізгіндеу – мен үшін үлкен жауапкершілік. Ал жауапкершіліктің жүгі жеңіл болған ба?!
Теңізшілердің әр күні қызыққа толы. «Кемедегінің жаны бір» деген қағидамен өмір сүретін жеке құрам бір отбасының баласындай болып кеткен. Олардың теңізге бейімделуі де – өз алдына бір үдеріс.
Ерасыл айтады: «Алғашқы күндері теңіздегі қызмет матростарға айтарлықтай қиындық туғызады. Оның ішінде күзде келіп, сапқа тұрғандардың үйренісіп кетуі уақытты қажет етеді. Жалпы, күз, қыс, көктем мезгілдеріндегі ауа райы құбылмалы. Сол себепті, теңіз толқынды болады. Кеме тербеліп, кейбіреуі құсып, енді бірінің ұйқысы келіп жатады. Дегенмен үйренісіп кетеді. Қалай дегенмен, әскери қызмет адамның тұлға ретінде жан-жақты қалыптасуына оң ықпал ететін орта екені сөзсіз. Бойда қайсар мінез бен жауынгерлік рух барда алынбас қамал жоқ».
Еліне қызметі адал, өз ортасында абыройлы кеме командирі туралы әріптестері жақсы пікірде. Ерасылдың табандылығы мен арманына деген адалдығы – қарулас достары мен замандастарына үлгі. Елім деген ұландардың бәрі Ерасыл Зейінұлы сияқты Отан алдындағы қызметінің маңызын түсініп, жауапкершілігін сезіне білсе, ұлтым деген ұлдардың абыройы қашанда биік болмақ.
Мұхарбек ЖӘКЕЙҰЛЫ,
әскери журналист
