Отандық жоғары оқу орындарының жүздіктер керуеніне қатысуы биыл жоғары көрсеткіштермен ерекшеленді. Халықаралық білім беру кеңістігінде өз ықпалын арттыру мақсатында білім беру бағдарламаларының саны тоғызға, ал рейтингтегі жоғары оқу орындарының саны сегізге жетті.
Л.Н.Гумилев атындағы Еуразия ұлттық университеті, Satbayev University, Әл-Фараби атындағы Қазақ ұлттық университеті, Абай атындағы Қазақ ұлттық педагогикалық университеті, Абылайхан атындағы Қазақ халықаралық қатынастар және әлем тілдері университеті, Suleyman Demirel University, Қожа Ахмет Ясауи атындағы Халықаралық қазақ-түрік университеті, Қазақ ұлттық аграрлық зерттеу университеті бес пәнді қамтитын салалық рейтингтерге қатысты. Осы орайда өнер және гуманитарлық ғылымдар, инженерлік ғылымдар мен технологиялар, өмір туралы ғылымдар және медицина, жаратылыстану ғылымдары, қоғамдық ғылымдар және менеджментте рейтингтік көрсеткішке қол жеткізді.
«QS» аймақтық директоры Сергей Христолюбов: «Әлемнің үздік университеттерінің пәндік рейтингтеріндегі отандық жоғары оқу орындарының саны сегізге жетті. Бұл үш жыл бұрынғы көрсеткіштен төрт есе көп. Жаңа пәндік нәтижелер Қазақстанның қазіргі ғылыми күн тәртібіндегі жоғары оқу орындарының рейтингтерін ілгерілету мүмкіндігін көрсетеді», деді.
Әл-Фараби атындағы Қазақ ұлттық университеті отандық және Орталық Азияның жоғары оқу орындары арасында дайындық бойынша 14 бағытта және бес пәндік саланың төртеуі бойынша нақты нәтижелерге қол жеткізіп отыр. Биыл университет «география» бағыты бойынша алғаш рет 151-200 позицияны иеленіп, әлемдегі ең үздік 200 университеттің, сондай-ақ «философия» бағыты бойынша үздік 150 университеттің қатарына еніп отыр. Ұлттық университеттің 542 білім беру бағдарламасының 25 пайызы «QS by Subject» рейтингіне еніп, салыстырмалы кезеңде 4 пайызға артты. «Археология», «Ағылшын тілі мен әдебиеті» – 151-200, «Математика» – 251-300, «Физика және астрономия» – 451-500, «Химия» – 501-550 бағытында өткен жылғы орнын сақтап қалды. Университет ғалымдары жарияланымдық белсенділігін сақтай отырып, 500-ден астам жетекші шетелдік жоғары оқу орнымен ынтымақтастығын жалғастырумен қатар зерттеу университеті мәртебесін нығайта түсуді көздейді.
Аталған рейтингте Қазақ ұлттық аграрлық зерттеу университеті «Ауыл шаруашылығы және Орман ресурстары» (Agriculture and Forestry) бағыты бойынша 401-ден – 301-350-ге дейінгі тұғырға көтерілді. Университеттің «QS by Subject» рейтингіндегі көрсеткіші аталған оқу орнының отандық және әлемдік озық ғылыми ұйымдарымен және әлеуетті жұмыс берушілермен ынтымақтастығының жоғары екенін көрсетеді.
«QS by Subject» рейтингі университеттердің академиялық беделін бағалайтын бес индикаторда түлектер туралы жұмыс берушілердің пікірлері, профессор-оқытушылар құрамының ғылыми мақалаларына сілтеме жасау, Хирш индексі және университеттің әлемге әйгілі ұйымдармен халықаралық зерттеу байланыстары негізге алынады. Осы нәтижелерге қарап, еліміздің зерттеу университеті мәртебесі бар жоғары оқу орындарының көрсеткіштері алдағы уақытта да рейтинг сапасына әсер ететінін көрсетеді.
