Университет қаржыландырған «Болашақ география мұғалімдерінің туристік-өлкетану құзыретін қалыптастырудың құрылымдық моделін жасау арқылы өлкетануды ұйымдастыру» жобасы аясында iOS, Microsoft Windows, Mac OS X (iTunes) операциялық жүйелері мен App Store және Google Play платформаларындағы мобильді географиялық ақпараттық жүйе қосымшаларына зерттеу жүргізілген. Е.Исақов бастаған зерттеу тобы (Ш.Лайсханов және Н.Үсенов) туристік-өлкетану саласындағы жұмыстарды ұйымдастыру мен жүргізуде пайдалануға болатын Google Play-ден 250-ге жуық және App Store-дан 150-ге жуық қосымшаны анықтаған.
Зерттеу тобы смартфонға жүктеуге болатын мобильді географиялық ақпараттық жүйе қосымшаларының функционалдығы мен артықшылықтарын бес топқа жіктеп, болашақ география мұғалімдерінің туристік-өлкетану құзыреттілігін қалыптастырудың моделін жасақтады. Сондай-ақ туристік-өлкетану іс-әрекеттерін ұйымдастыру және жүргізу үшін оқу бағдарламасын және оқыту технологиясын әзірлеп, тиімділігін дәлелдеп шықты.
Жоба аясында Е.Исақов Ыстанбұлдағы (Түркия) «Rimar Academy» мен Мажарстан ауыл шаруашылығы және жаратылыстану ғылымдары университетінің «Тұрақты туризм» департаментінде болып зерттеу тәжірибесін жүргізді. Сонымен қатар зерттеу нәтижелері Scopus базасында индекстелетін Geojournal of Tourism and Geosites (69-процентиль) журналында және тиісті министрліктің Ғылым және жоғары білім саласындағы сапаны қамтамасыз ету комитеті ұсынған басылымда жарияланды.
АЛМАТЫ
