Еліміз бен Еуропа одағы арасында жаңа келісім жасалмақ

АСТАНА. 4 шілде. Қазақстан мен Еуропа одағы 1995 жылы қол қойылған әріптестік және ынтымақтастық туралы келісімді қайта қарап, оны жаңартуға мүдделі. Сыртқы істер министрлігі осылай деп мәлімдеді. Бұл туралы  today.kz хабарлады. Хабарламада көрсетілгендей, Брюссельде 30 маусым мен 1 шілде аралығында Қазақстан мен Еуропа одағы әріптестігі мен ынтымақтастығын кеңейту туралы жаңа келісімге қатысты келіссөздердің жетінші кезеңі аяқталған. Жаңадан түзілгелі отырған бұл келісімде қауіпсіздік және құқық саласындағы ынтымақтастықты, сондай-ақ, өзара сауда және инвестициялық, экономикалық және гуманитарлық байланыстарды дамыту қамтылған. Келтірілген мәліметке қарағанда, Еуропа одағының елімізге қалыптасып үлгерген аймақтық держава ретінде стратегиялық қызығушылығы артып отыр. Екіжақты келіссөздердің соңғы кезеңі қыркүйек айында Астанада өтеді деп күтілуде. Жолдыбай Базар. Дереккөз: today.kz. Фото: today.kz.