Ақтөбе облысында екі басқарманың басшылары тағайындалды

АСТАНА. 10 шілде. Ақтөбе облысының әкімі Архимед Мұхамбетовтің өкімімен облыстық кәсіпкерлік және индустриалды-инновациялық даму басқармасын қайта құру барысында пайда болған екі басқарманың басшылары тағайындалды. Бұл туралы «ҚазАқпарат» хабарлады. Хабарламада көрсетілгендей, облыстық индустриалды-инновациялық даму басқармасының басшысы болып Марат Балмұханов тағайындалды. 53 жастағы Марат Нүренұлы Балмұханов Мәскеу тау-кен институтын тау-кен инженері мамандығы бойынша бітірген. Еңбек жолын 1976 жылы Мұғалжар ауданының Дмитрева атындағы кеңшарында тіркеуші болып бастаған. Ол 1998 жылы облыстық экономика басқармасы сыртқы экономикалық байланыс және инвестиция бөлімінің бастығы, кейіннен басқарма бастығының орынбасары болды. 2005 жылы Ақтөбе облыстық кәсіпкерлік және өнеркәсіп департаменті директорының орынбасары қызметіне тағайындалды. 2010 жылдан бастап осы тағайындауға дейін облыстық кәсіпкерлік және индустриалды-инновациялық даму басқармасын басқарып келді. Ал облыстық кәсіпкерлік басқармасының басшысы болып Бағжан Тілегенов тағайындалды. 32 жастағы Бағжан Тілегенов еңбек жолын 2006 жылы Ақтөбе облысы кәсіпкерлік және өнеркәсіп департаментінің іс қағаздарын жүргізу инспекторы болып бастаған. 2008 жылы облыстық кәсіпкерлік және өнеркәсіп басқармасы бөлімінің бастығы болды. 2012 жылдың наурызынан бастап осы тағайындауға дейін Ақтөбе облыстық кәсіпкерлік және индустриалды-инновациялық даму басқармасы басшысының орынбасары қызметін атқарды. Жолдыбай Базар. Дереккөз: «ҚазАқпарат». Фото: i-news.kz.