Елордадағы экотакси автопаркі көлік санын 500-ге жеткізуді көздеп отыр

АСТАНА. 10 шілде. Астанадағы экотакси автопаркі EXPO-2017 көрмесі өтетін уақыт жақындағанда көлік санын 500-ге жеткізуді жоспарлауда. Бұл туралы BusinessNews.kz хабарлады. Астана әкімі Иманғали Тасмағамбетовке қазірдің өзінде жаңа 70 экологиялық көлік көрсетілді. Бұл автомобильдерді Қостанайдағы AllurGroup компаниясы шығарған. Нақтылай айтқанда, «Экотакси» жобасы шеңберінде алғаш рет Peugeot Partner маркалы отандық өндірісте шығарылған көліктер ұсынылып отыр. Бұлар WI-FI-мен, планшеттермен және ақшаны аудару арқылы төлеу жүйелерімен жарақтандырылған. Peugeot сұйытылған газ, пропан-бутан (LPG) қоспасы негізінде жұмыс істейді. Қазіргі уақытта қалада 200 экологиялық көлік қызмет көрсетуде. Олар негізінен қостанайлық «Агромаш Холдинг» зауытында шығарылған SsangYong Kyron маркалы көліктер. Жалпы, «Экотакси» инвестициялық жобасы 2013 жылдың желтоқсанында іске қосылған болатын. Жолдыбай Базар. Дереккөз: BusinessNews.kz. Фото: BusinessNews.kz.