2017 жылы еліміз жалпыға ортақ декларациялау жүйесіне өтуі мүмкін

АСТАНА. 10 шілде. Елімізде шағын және орта бизнестің әлеуеті жыл сайын артып келеді. Салық комитетінің есепке алу, талдау және мониторинг басқармасының басшысы Айдар Байманов осылай деді. Бұл туралы «24kz» хабарлады. Айдар Баймановтың айтуынша, биылғы жартыжылдықта ел бюджеті салық есебінен 963,1 млрд. теңгемен толыққан. Фискальдық орган қызметкерлері белгіленген межені 30 млрд. теңгеге асыра орындаған. Салықтың 60 пайызы шағын және орта бизнестің үлесіне тиесілі. Сондай-ақ, ол: «Шағын және орта бизнестің түсімі және олардың саны да жылдан-жылға артып келеді. Себебі олардың әртүрлі экономикалық дағдарыстарға қарсы тұруға мүмкіншіліктері мол. Айта кетерлігі, 1 шілдеден бастап салық комитетінің бастамасымен елімізде электрондық шот-фактура енгізілді. Бұл Мемлекет басшысының тапсырмасына сәйкес, компаниялар жұмысының тиімділігін арттыруға, ақпаратты өңдеу шығындары мен оған жұмсалатын уақытты азайту мақсатында енгізіліп отыр. Бұған коса 2017жылы еліміз жалпыға ортақ декларациялау жүйесіне көшеді деп жоспарлануда», – деді. Жолдыбай Базар. Дереккөз: «24kz». Фото: brainity.ru.