Саясат • 02 Мамыр, 2023

Мемлекет басшысы Қазақстан-Франция үкіметаралық комиссиясының тең төрағасын қабылдады

301 рет
көрсетілді
2 мин
оқу үшін

Президент Францияның Сыртқы сауда, экономикалық тартымдылық және шетелдегі француз азаматтарының істері жөніндегі министр-делегаты, Қазақстан-Франция үкіметаралық комиссиясының тең төрағасы Оливье Бештті қабылдады, деп хабарлайды Egemen.kz Ақорда баспасөз қызметіне сілтеме жасап. 

Мемлекет басшысы Қазақстан-Франция үкіметаралық комиссиясының тең төрағасын қабылдады

Мемлекет басшысы жоғары лауазымды дипломатқа ілтипат білдіре отырып, қазақ-француз қарым-қатынастарының деңгейіне жоғары баға беріп, оның елімізге алғашқы ресми сапары барлық саладағы стратегиялық серіктестікке тың серпін беретініне сенімді екенін айтты.

«Франция – Еуропадағы ең басты серіктесіміз. Ынтымақтастығымызды одан әрі нығайтуға мүмкіндігіміз мол екеніне сенімдімін», деді Қасым-Жомарт Тоқаев.

Кездесуде Қасым-Жомарт Тоқаевтың Францияға жасаған сапарының қорытындысы бойынша, соның ішінде сауда-экономикалық және инвестициялық салаларда қол жеткізілген уағдаластықтарды жүзеге асыру мәселелері талқыланды.

Мемлекет басшысы Қазақстан нарығына, әсіресе мұнай-газ химиясы, жасыл энергетика, авиация және өңдеу өнеркәсібі, көлік және логистика салаларына француз бизнесін кеңінен тарту үшін барлық қажетті жағдайды жасауға дайын екенін айтты.

Оливье Бешт Мемлекет басшысына қонақжайлық көрсеткені үшін алғысын айтып, Қазақстан мен Франция арасындағы ынтымақтастықтың қарқынды дамуына көңілі толатынын жеткізді.

«Былтыр қараша айында Парижге жасаған ресми сапарыңыз өте сәтті болды және екіжақты қарым-қатынастарға нақты саяси серпін берді. Президентіміз Сізбен арадағы жақсы қарым-қатынасты одан әрі нығайтуды маңызды деп санайды. Бұл бізге аса маңызды халықаралық мәселелер бойынша жан-жақты пікір алмасуға мүмкіндік береді. Сондықтан Президентіміз серіктестігімізді дамытуға барынша күш салуымды сұрады. Қазақстан – сенімді серіктес, достас мемлекет әрі Орталық Азиядағы бізбен стратегиялық байланыс орнатқан жалғыз ел», деді министр-делегат.

Кездесу барысында халықаралық күн тәртібіндегі өзекті мәселелер де қарастырылды.

а