Атырау өнімдері сырттан әкелінетін тауарларды ысыра бастады

АСТАНА. 11 шілде. Атырау облысында жергілікті дихандар өсірген көкөністер нарықты жаулап алды. Бұл туралы «ҚазАқпарат» хабарлады. Атырау қалалық кәсіпкерлік бөлімінің жетекшісі Қадырғали Тұрғанов: «Биыл маусымды алғашқы болып ашқан «Дастан» шаруа қожалығы. Осы аптада оның қатарына  «Мұсағали», «Барыс болашақ» және «Қамалов» шаруашылықтары қосылды. Бұл шаруа қожалықтары ұсынып отырған көкөністердің бағасы: қияр – 100 теңге, қызанақ – 320, орамжапырақ – 50, болгар бұрышы – 250 теңге, сәбіз байламы – 100,  жасыл пияз байламы – 50 теңге», – деді. Хабарламада көрсетілгендей, базарлар мен дүкендерде жергілікті қарбыздар да пайда болған. Соның нәтижесінде бір кило қарбыздың құны бір күннің ішінде  120-дан  70 теңгеге төмендеген. Ал ең бастысы, жергілікті дихандар өз өнімдерін саудаға шығара бастағалы Өзбекстан мен Қытайдан әкелінген көкөністер мен картоптың бағасы біршама арзандаған. Жолдыбай Базар. Дереккөз: «ҚазАқпарат». Фото: «ҚазАқпарат».