Іс-шараны Қазақстан Жазушылар одағының Батыс Қазақстан облыстық филиалы және Қадыр Мырза Әлі атындағы өнер және мәдениет орталығы ұйымдастырды. Ескерткіш тақтаның шығынын марқұмның досы, өнер жанашыры Шәһидолла Әбуғали көтеріп алған.
Әл-Фараби атындағы ұлттық университеттің журналистика факультетін бітірген Рашид бүкіл саналы өмірін Батыс Қазақстан облыстық телерадио корпорациясында өткізді. Ол қаламгерлігінен бөлек, Ақжайық өңірінің мәдениеті мен өнері, айтулы тұлғалары жайында хабарлар циклін жасаған руханият жанашыры еді. Рашидтің сатиралық шығармаларының өзі «Тәмам жанның мінін айт, Жалған айтпай, шынын айт, Аяп, ішің жылып айт – Адамды бастыр ілгері» дейтұғын Шәкерім ойшылдың қағидасына сай еді.
Қадыр Мырза Әлі атындағы өнер және мәдениет орталығының «Жарқ етіп сөнген бір жұлдыз» жобасы аясында өткен «Сатираның сойы» атты еске алу іс-шарасында қаламгер туралы әріптестері Бауыржан Халиолла, Сағынтай Бисенғалиев, Бауыржан Ғұбайдуллин, Клара Хамбетовалар әсерлі естелік айтты. Қазақтың тағы бір аяулы тұлғасы – бард ақын Табылды Досымов пен Рашидтің қылаусыз достығы да әңгіме арқауы болды. Рашид Шақудың «Арыс» баспасынан жарық көрген «Сөз жебесі» атты кітабын ақынның қарындасы Әлия Шақуова кеңірек таныстырып өтті.
«Біз өміріне қаламды серік етіп, қазақтың өнері мен мәдениетіне еңбек сіңірген әріптестерімізді әрдайым ұмытпаймыз. Болашақта «Құрмет» орденінің, Қазақстан Парламентінің «Парламент сөзі» сыйлығының лауреаты, республикалық «Egemen Qazaqstan» газетінде ұзақ жыл қызмет атқарған танымал журналист Темір Құсайын ағамыздың да тұрған үйіне осындай ескерткіш тақта ашылатын болады», деп хабарлады Қазақстан Жазушылар одағы Батыс Қазақстан облыстық филиалының директоры Бауыржан Халиолла.
Батыс Қазақстан облысы
